ޕީޕަލްސް ނޭޝަނަލް ކޮންގްރެސް، ޕީއެންސީ އެތެރޭގެ އިންތިޚާބުގެ ވަގުތީ ނަތީޖާ އިއުލާންކޮށް، ޝަކުވާ ހުށަހެޅުމުގެ ފުރުޞަތު ހުޅުވާލައިފިއެވެ.

އެ ޕާޓީން ރޭ ނެރުނު އިއުލާނެއްގައި ބުނެފައިވާގޮތުން ވަގުތީ ނަތީޖާ އިއުލާނު ކުރީ ވޯޓުލާ މަރުކަޒުތަކުގައި ވޯޓު ގުނައި އެ މަރުކަޒުތަކުގައި އިއުލާނުކުރި ގޮތަށްކަން ކަށަވަރު ކުރުމަށް ފަހުގައި ކަމަށެވެ.

ވަގުތީ ނަތީޖާއަށް ފަހު ރާއްޖޭގެ އެކިކަންކޮޅުތަކުގައި ބެހެއްޓި 143 ވޯޓު ފޮށި ކަރުދާސްތަކާއި ނަތީޖާ ޝީޓުތަކުގެ އަސްލު ޕާޓީގެ ރަސްމީ އޮފީހަށް ލިބުމުން ހުށަހެޅިފައިވާ ޝަކުވާތަތަކަށް ރިއާޔަތް ކުރުމަށްފަހު، ދާއިމީ ނަތީޖާ އިއުލާނު ކުރާނެކަމަށް ވެސް އެ އިއުލާނުގައިވެއެވެ.

Advertisement

އެ ޕާޓީން ބުނީ ވޯޓުލުމުގެ ކުރިން އިންތިޚާބްވި މެމްބަރުންނާއި ވޯޓުން އިންތިޚާބްވި މެމްބަރުންގެ މެދުގައި ނަގާ ވޯޓަކުން 72 ގަޑިއިރު ތެރޭ އިންތިޚާބް ކުރަން ޖެހޭ މަގާމުތައް ކަނޑައެޅުމުގެ މަރުހަލާ ދާއިމީ ނަތީޖާއަށްފަހު ކުރިޔަށް ގެންދާނެ ކަމަށެވެ.

އެ ޕާޓީގެ އެތެރޭގެ އިންތިޚާބުގެ ވަގުތީ ނަތީޖާ އިއުލާނުކޮށްފައިވާއިރު ނަތީޖާއާ މެދު އެއްވެސް ޝައްކެއްވާނަމަ ޝަކުވާ ހުށަހެޅުމަށް ވެސް ވަނީ ހުޅުވާލާފައެވެ.

ޕީއެންސީގެ އެތެރޭގެ އިންތިޚާބް މިދިޔަ ހޮނިހިރު ދުވަހު ކުރިޔަށް ގެންގޮސްފައިވާއިރު އިންތިޚާބްގައި 648 ކެންޑިޑޭޓުން ވާދަކުރިއެވެ. ޖުމްލަ 1984 މަގާމަށް މީހުން އިންތިޚާބް ކުރުމަށް ހަމަޖެހިފައި ވީނަމަވެސް މީގެތެރެއިން 1300 މަގާމަށް އެންމެ ކެންޑިޑޭޓަކު ކުރިމަތިލައިފައިވާތީ އެ 1300 މަގާމަށް ވަނީ އިންތިޚާބަކާ ނުލައި މީހުން ހޮވިފައެވެ.