ރާއްޖޭގައި ހުންނަވާ ޗައިނާގެ ސަފީރު ވާން ލިޒިން ސަފީރުކަމުގެ ދައުރު ހަމަވެއްޖެ އެވެެ.

އެހެންވެ އެނބުރި ގައުމަށް ވަޑައިގެންނެވުމުގެ ކުރިން ސަފީރު އިއްތެ ފޮރުން މިނިސްޓަރުގެ އަރިހަށް އިހުތިރާމުގެ ޒިޔާރަތެއް ވެސް ކުރެއްވި އެވެ.

އިއްޔެގެ އެ ބައްދަލުވުމުގައި، ވޭތުވެދިޔަ ތިން އަހަރުގެ ތެރޭ ރާއްޖެ އާއި ޗައިނާ ގުޅުން އިތުރަށް ބަދަހިކުރުމަށް ސަފީރު ކުރެއްވި މަސައްކަތަށް މިނިސްޓަރު ހަލީލު ޝުކުރު އަދާކުރެއްވި ކަމަށް ފޮރިން މިނިސްޓްރީން ނެރުނު ބަޔާނެއްގައި ބުންޏެވެ. އަދި ސަފީރުގެ ފަރާތުން ލިބުނު އެހީތެރިކަަމަށް ދިވެހި ސަރުކާރުގެ ނަމުގައި ޝުކުރު ވެސް އަދާކޮށްފައިވެ އެވެ.

Advertisement

ބައްދަލުވުމުގައި ލިޒިނ ވަނީ އޭނާގެ ސަފީރުކަމުގެ ދައުރުގައި ދިވެހިންނާއި ދިވެހި ސަރުކާރުން ދިން އެހީތެރިކަމާއި މެހުމާންދާރީއަށް ޝުކުރު އަދާކުރައްވައި ކުރިއަށް އޮތް ތަނުގައި ވެސް ދެ ގައުމުގެ ގުޅުން ބަދަހިކުރުމަށް ގާތުން މަސައްކަތްކުރައްވާނެ ކަމަށް ވިދާޅުވެފަ އެވެ.

ޗައިނާ އިން ކަނޑައެޅި ހުންނަ މަގާމަށް ލިޒިން އައްޔަން ކުރެއް ކަމުގެ ރަސްމީ ފަތްކޮޅު ކުރީގެ ރައީސް އިބްރާހިމް މުހައްމަދު ސޯލިހު އަށް އެރުއްވީ ސެޕްޓެމްބަރު 6، 2021 ގަ އެވެ.

ލިޒިންގެ ދައުރު ހަމަވި ނަމަވެސް ޗައިނާ އިން ރާއްޖެއަށް ދެން ކަނޑައަޅާ ސަފީރަކު އަދި ހާމައެއް ނުކުރެ އެވެ.