ޕާޓީ ބަދަލުކުރުމުން، ނުވަތަ ޕާޓީން ވަކިކުރުމުން، ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލޭ ގޮތަށްގާނޫނުއަސާސީ އަށް ގެނައި އިސްލާހުތައް ބާތިލު ކުރަން ސުޕްރީމް ކޯޓަށް ހުށަހެޅި މައްސަލަ ބަލައިގަނެފި އެވެ.

އެ މައްސަލަ މިދިޔަ އާދީއްތަ ދުވަހު ކޯޓަށް ހުށަހެޅުއްވީ ގާނޫނީ ވަކީލު އަދި ކެންދޫ ދާއިރާގެ ކުރީގެ މެންބަރު އަލީ ހުސެއިނެވެ. މި މައްސަލައިގެ ތެރެއަށް ތަދަހުއްލުވުމަށް އިދިކޮޅު އެމްޑީޕީ އާއި ޑިމޮކްރެޓްސް ޕާޓީން އޮތީ ހުށަހަޅައިފަ އެވެ.

ެއަލީ ހުށަހެޅިއްވި މައްސަލައިގައި ބުނެފައި ވަނި ގާނޫނުއަސާސީ ހަވަނަ އިސްލާހު ގެނެސްފައި ވަނީ ގާނޫނުއަސާސީގެ ހަތަރު ވަނަ މާއްދާ އާއި އަށްވަނަ މާއްދާ އާއި 26 ވަނަ މާއްދާ އާއި 75 ވަނަ މާއްދާ އަދި 90 ވަނަ މާއްދާއާ ހިލާފަށް ކަމަށެވެ. އެ އަދި އެއީ، ގާނޫނުއަސާސީގެ އަސާސީ އޮނނިގަނޑާ ވެސް ހިލާފަށް ކޮށްފައިވާ ކަމެއް ކަމަށް ވިދާޅުވި އެވެ.

Advertisement

ގާނޫނުއަސާސީ އަށް އިސްލާހުތަކެއް ސަރުކާރުގެ ފަރާތުން މަޖިލީހަށް ހުށަހެޅީ މިދިޔަ ހަފުތާގެ ބުދަ ދުވަހެވެ. ހަމަ އެ ދުވަހު އެ ބިލު މުޅި މަޖިލީހުގެ ކޮމިޓީން ފާސްކޮށް، އެ ދުވަހުގެ ހަވީރު ތަޅުމުން ފާސްކޮށްފައިވެ އެވެ. އަދި އެ ދުވަހުގެ އިރާކޮޅު ރައީސް ޑރ. މުހައްމަދު މުއިއްޒު ވަނީ އެ ބިލު ތަސްދީގު ކުރައްވައިފަ އެވެ.

މިިކަމާ ގުޅިގެން މިހާރު ވަރަށް ގިނަ ބަޔަކު އަންނަނީ ކަންބޮޑުވުން ވެސް ފާޅުކުރަމުންނެވެ.