ސަރުކާރު ހިންގާ ޕީއެންސީ ކޯލިޝަންގައި ހިމެނޭ ޕީޕީއެމްގެ ސެނެޓު ބައްދަލުވުމެއް މިއަދު ބާއްވަން ނިންމައިފި އެވެ.

ރާއްޖޭގައި ކުރިން އެންމެ ނުފޫޒު ގަދަ އެއް ޕާޓީގެ ގޮތުގައި ފާހަގަކޮށްލެވުނު ޕީޕީއެމްގެ ސެނެޓް ބައްދަލުވުން ބާއްވަން ނިންމާފައި ވަނީ މިއަދު މެންދުރު ފަހު 2:00 ގަ އެވެ. ނަމަވެސް އެ ބައްދަލުވުމާ ގުޅޭ ތަފުސީލެއް ޕީޕީއެމުން ނުދެ އެވެ.

އެ ބައްދަލުވުމެއް އެންމެ ފަހުން ބޭއްވީ މިދިޔަ އޮކްޓޯބަރު މަހުގެ 17 ގަ އެވެ.

Advertisement

ރައީސް ޔާމީންގެ ވެރިކަމުގައި ރާއްޖޭގައި ދެވަނަ އަށް އެންމެ ބޮޑު ޕާޓީގެ ގޮތުގައު ފާހަގަކޮށްލެވުނު ޕީޕީއެމުން މި ފަހުން 7،400 އަށް ވުރެ ގިނަ މެންބަރުން ވަކިވެފައިވެ އެވެ. މިހާރު ޕީޕީއެމް އޮތީ ކުރިން އެ ޕާޓީގެ ހިޔަންޏެއްގެ ގޮތުގައި އޮތް ޕީއެންސީގެ ހިޔަންޏެއްގެ ގޮތުގަ އެވެ. އެގޮތުން ޕީއެންސީ ވެރިކަމަށް އައުމާ އެކީ ޕީއެމްއެމްގެ އަޑު އޮތީ އެއްކޮށް ކެނޑިފަ އެވެ. އަދި އެ ޕާޓީ އުވައިލަން އުޅޭކަމުގެ އަޑުތަކެއް ވެސް މި ފަހުން އެރި އެވެ.

ރައީސް ޑރ. މުހައްމަދު މުއިއްޒު ޕީއެންސގެ ޓިކެޓްގައި މިދިޔަ އަހަރުގެ ރިޔާސީ އިންތިހާބު ކާމިޔާބު ކުރުމާ އެކީ ޕީއެންސީ ވަރުގަދަ ކުރަން ފެށި މަސައްކަތުން އެ ޕާޓީގެ މެމްބަރުންގެ އަދަދު މިހާރު 82،000 އަށް ވުރެ ގިނަ ކަމަށް ބުނެފައިވެ އެވެ. ޕީއެންސީން މިހާރު އަމާޒު ހިފާފައި އޮތީ ރާއްޖޭގައި 100،000 މެމްބަރުން ހަމަވާ ފުރަތަމަ ޕާޓީއަކަށް އެ ޕާޓީ ހެދުމެވެ.