ގުޅީފަޅު, ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ)ގެ ބެލުމުގެ ދަށުން ނަގައި, ފަހި ދިރިއުޅުން ކޯޕަރޭޝަން (އެފްޑީސީ)ގެ ދަށަށް ބަދަލުކުރުމުގެ މަސައްކަތް ފަށައިފިއެވެ.

އެފްޑީސީން ބުނީ ގުޅިފަޅު އެ ކުންފުނީގެ ދަށަށް ބަދަލުކުރުމަށްޓަކައި ކުރަން ޖެހޭ މަސައްކަތްތައް ކުރަމުންދާކަމަށާއި ލިޔެކިޔުންތައް ބަދަލުކުރުމާއި މަޝްވަރާތައް މިހާރު ކުރިއަށްދާކަމަށެވެ.އަދި ގުޅީފަޅާ ގުޅޭގޮތުން ހަދާފައި ހުރި އެގްރިމަންޓުތައް ރިވިއު ކުރުމުގެ މަސައްކަތް ވެސް ކުރިއަށް ގެންދާކަމަށް ބުނެފައިވެއެވެ.

އެޗްޑީސީގެ ބެލުމުގެ ދަށުން ގުޅީފަޅު ނަގައި، އެފްޑީސީއަށް ދިނުމަށް ނިންމާފައިވާއިރު، ކެބިނެޓުން ވަނީ އެފްޑީސީއަކީ އެޗްޑީސީގެ ސަބްސިޑަރީ ކުންފުންޏެއްގެ ގޮތުގައި ހަމަޖެއްސުމަށް ނިންމައިފައެވެ.

Advertisement

މިކަމާއި ގުޅިގެން ހައުސިން މިނިސްޓަރު ހައިދަރު ވިދާޅުވީ މިބަދަލުގެ ސަބަބުން ދެކުންފުނީގެ ސްކޯޕަށް ބޮޑެތި ބަދަލުތަކެއް އަންނާނެކަމަށެވެ. މިގޮތުން މުޅި ރާއްޖޭގައި ހިންގޭ އަސާސީ ބޯހިޔާވަހިކަމުގެ މަޝްރޫޢުތައް ކުރިއަށް އޮތްތަނުގައި ހިންގާނީ އެފްޑީސީއިންނެވެ.

އަދި އެޗްޑީސީން ހިންގަމުންދިޔަ އަސާސީ ބޯހިޔާވަހިކަމުގެ މަޝްރޫޢުތައްވެސް ހަވާލުވެގެންދާނީ އެފްޑީސީއާއި ކަމަށާއި ނަމަވެސް އެފްޑީސީ ހިނގަމުންދާނީ އެޗްޑީސީގެ ދަށުން ކަމަށްވެސް މިނިސްޓަރ ހައިދަރު ފާހަގަކުރެއްވިއެވެ.