ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ލިބުނު އެހީއާ މެދު އޮތް ހިތްހަމަނުޖެހުން ސޯޝަލް މީޑިއާގައި ހިއްސާކުރި މީހަކަށް ދިން އެހީގެ ތަފުސީލު ހާމަކުރެވުމުން އެކަމަށް އެ އެޖެންސީން މައާފަށް އެދިއްޖެ އެވެ.

އެންސްޕާ އިން ދިން އެހީއާ މެދު ހިތްހަމަނުޖެހިގެން އެކްސްގައި މީހަކު ކުރި ޕޯސްޓަކަށް ރައްދުދީ އެންސްޕާ އިން ނެރުނު ބަޔާނެއްގައި ވަނީ އެ އެޖެންސީން އެ މީހާއަށް ފޯރުކޮށްދީފައިވާ އެހީގެ ތަފުސީލުތަކެއް ހާމަކޮށްފަ އެވެ. އެކަމާ ގުޅިގެން ގިނަ ބައެއްގެ ފާޑުކިޔުން އެންސްޕާ އަށް ވަނީ އަމާޒުވެފަ އެވެ.

އެންސްޕާ އިން ރޭ ނެރުނު ނޫސް ބަޔާނެއްގައި ބުނީ، އެ ތަފުސީލުތައް ހާމަކުރީ އެ އެޖެންސީން އެހީ ނުދިން ކަމަށްބުނެ، ސޯޝަލް މީޑިއާގައި ދޮގު މައުލޫމާތު ފަތުރާ އެ އެޖެންސީން ބަދުނާމުވާ ގޮތަށް ފަތުރަމުންދިޔަ ވާހަކަތަކާ ގުޅިގެން ކަމަށެވެ.

Advertisement

އެ ތަފުސީލުތަކުގައި ބަލިމީހާގެ އެއްވެސް އައިޑެންޓިޓީއެއް ބަޔާންކޮށްފައި ނެތް ނަމަވެސް އެ ތަފުސީލުގައި ބަލި މީހާއަށް އެ އެޖެންސީން ދީފައިވާ އެހީގެ މައުލޫމާތު ހިމެނިފައިވާތީ އެއީ އެންމެ ރަނގަޅު ގޮތް ކަމުގައި ނުވާތީ އެކަމަށް މައާފަށް އެދޭ ކަމަށް އެންސްޕާ އިން ބުންޏެވެ.