ރިފޯމް ކޮމިޝަނަރު މަޤާމަށް ކުރީގެ ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން އަސްމާ ޝަފީޢު އައްޔަންކުރައްވައިފިއެވެ.

ރިފޯމް ކޮމިޝަނަރުގެ މަޤާމަށް އަސްމާ ޝަފީޢު އައްޔަންކުރައްވާފައިވަނީ މާލީ ވުޒާރާއިންނެވެ.

ރީފޯމް ކޮމިޝަނަރުގެ މަޤާމަށް ބޭފުޅަކު އައްޔަންކުރައްވާފައިވާއިރު ރީފޯމް އޮފީސް ޤާއިމްކުރުމުގެ މަޤްޞަދަކީ ދައުލަތު މާލީ ކަންކަން ހަރުދަނާ ކުރުމަށް، ޚަރަދުކުޑަކޮށް، އާމްދަނީ އިތުރުކުރުމަށް ސަރުކާރުން ގެންނަން ނިންމާފައިވާ އިސްލާހީ ބަދަލުތައް ތަންފީޒު ކުރުމުގެ މަސައްކަތް ކުރުމެވެ.

Advertisement

ރީފޯމް ކޮމިޝަނަރުގެ މަސްއޫލިއްޔަތުތަކުގެ ތެރޭގައި އިސްލާޙީ ބަދަލުތަކުގެ އިސްތިރާޖުތައް އެކުލަވާލުމާއި، ސަރުކާރު ހިއްސާވާ ކުންފުނިތަކާއި އަދި ފިސްކަލް ރިފޯމުތައް ކުރިއަށްދާ ގޮތުގެ ރިޕޯޓުތައް އެކުލަވާލައި އެކަމާ ގުޅޭ ފްރޭމްވޯކްތައް އެކުލަވާ ރޭވުމުގެ މަސައްކަތް ހިމެނެއެވެ. ރިފޯމް ކޮމިޝަނަރ ޖަވާބުދާރީވާނީ މާލީ ވަޒީރަށެވެ.

ރިފޯމް ކޮމިޝަނަރގެ މަޤާމަށް އައްޔަން ކުރައްވާފައިވާ އަސްމާ ވަނީ މީރާގައި ގިނަ ދުވަސްތަކެއްގެ ވަންދެން ޚިދުމަތް ކުރައްވާފައެވެ. އެގޮތުން، 2010 ވަނަ އަހަރުން ފެށިގެން މީރާގައި މަސައްކަތް ކުރައްވާފައިވާއިރު، އޭނާ ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް އައްޔަންކޮށްފައިވަނީ 2019 ވަނަ އަހަރުއެވެ. އަސްމާގެ މަޤާމުގެ ދައުރު މިދިޔަ އޮކްޓޯބަރމަހު ވަނީ ހަމަވެފައެވެ.

ރިފޯމް ކޮމިޝަނަރުގެ މަޤާމަށް އަސްމާ އައްޔަންކޮށްފައިވާއިރު، ސަރުކާރުން ގެންނަ އިސްލާހީ ބަދަލުތައް ތަންފީޒުކުރުމަށް ރިފޯމް އޮފީހެއްވެސް ޤާއިމްކުރައްވާފައެވެ.