ބިންވެރިޔާ ސްކީމް ލިސްޓުގައި ނުހިމެނޭ ބަޔަކަށް ގޯތިތަކެއް ދީފައިވާ މައްސަލާގައި، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިންގ ޑިރެކްޓަރު އިބްރާހިމް ފަޒުލް ރަޝީދަށް މިހާތަނަށް އެއްވެސް ތުހުމަތެއް ނުކުރާ ކަމަށް ފުލުހުން މިރޭ ބުނެފި އެވެ.

ބިންވެރިޔާ ސްކީމްގައި ނުހިމެނޭ ބަޔަކަށް ގޯތިތަކެއް ދީފައިވާ މައްސަލާގައި ތަހުގީގާ ގުޅޭގޮތުން މައުލޫމާތު ދިނުމަށްޓަކައި މިރޭ ފުލުހުން ވަނީ ނޫސްވެރިންގެ ބަައްދަލުވުމެއް ބާއްވާފައެވެ. މި ބައްދަލުވުމުގައި ނޫސްވެރިންނަށް މައުލޫމާތު ދެއްވަމުން އެސިސްޓެންޓް ޕޮލިސް ކޮމިޝަނަރު ޝަރީފް ވިދާޅުވީ ސުވާލު އުފެދޭ ލިޔުންތަކާ ގުޅޭގޮތުން މިހާތަނަށް ހަ ފަރާތަކާ ސުވާލުކުރެވިފައިވާ ކަމަށެވެ.

އަދި އޭނާ ވިދާޅުވީ މި މައްސަލައާއި ގުޅޭގޮތުން ތަހުގީގު އިތުރަށް ފުޅާކޮށް، އިތުރު ފަރާތްތަކާ ސުވާލުކޮށް، މި ކަމުގައި އިތުރު ބިންތަކާއި ފްލެޓުތައް ހިމެނޭތޯ ވެސް ފުލުހުން ބަލާނެ ކަމަށެވެ.

ފުލުހުންގެ އިތުރުން އެންޓި ކޮރަޕްޝަން ކޮމިޝަން (އޭސީސީ)އިން ވެސް މި މައްސަލަ ތަހުގީގު ކުރަމުންދާއިރު، ފަޒުލް ވަނީ އޭނާ ހުންނެވި މަޤާމުން ސަސްޕެންޑްކޮފައެވެ.