ކުރިއަށް އޮތް ރިޔާސީ އިންތިހާބުގައި ޖުމްހޫރީ ޕާޓީގެ ކޯލިޝަންގައި ބައިވެރިވުމަށް މަޝްވަރާކުރުމަށް ކުރީގެ ނައިބު ރައީސް އަހްމަދު އަދީބުގެ މޯލްޑިވްސް ތާޑް-ވޭ ޑިމޮކްރެޓްސް (އެމްޓީޑީ) އަށް ފޮނުވި ސިޓީއާ ގުޅޭގޮތުން ގޮތެއް ނިންމާނީ ޕާޓީގެ ކައުންސިލްގައި މަޝްވަރާ ކުރުމަށް ފަހުގައި ކަމަށް އެ ޕާޓީން ބުނެފިއެވެ.

ޖުމްހޫރީ ޕާޓީގެ ލީޑަރު ޤާސިމް އިބްރާހިމް ސޮއި ކުރައްވާ ފޮނުވާފައިވާ ސިޓީގައި 2023ގެ ރިޔާސީ އިންތިހާބު ކާމިޔާބު ކުރުމަށް ޖޭޕީން ގިނަ ބައެއްގެ ބައިވެރިވުން އޮންނާނެ ގޮތެއްގެ މަތިން ޤައުމުގެ ކަންކަން އިސްލާހުގެ މަގަށް ގެނައުމަށް އެމްޓީޑީ އާއި އެކު މަޝްވަރާ ކުރުމަށް ބޭނުންވާ ކަމަށެވެ.

މީގެ ކުރިން ޖޭޕީން ވަނީ އެމްއާރްއެމް، ޕީޕީއެމް އާއި އެމްއެންޕީއަށްވެސް ކޯލިޝަންގެ ދައުވަތު ފޮނުވާފައެވެ.

Advertisement

ޖޭޕީއާއެކު ކޯލިޝަން ހެދުމާ މެދު މިހާތަނަށް ރަސްމީކޮށް އެއްބަސްވެވިފައި ވަނީ އެމްޑީޕީގެ އެތެރޭގައި އުުފެދިފައިވާ "ފިކުރެއްގެ ދިރުން" ފެކްޝަނާ އެކުގައެވެ. ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދުގެ އެ ފެކްޝަނާ އެކު މެނިފެސްޓޯ ތައްޔާރު ކުރުމުގެ މަސައްކަތް ވެސް ވަނީ ފަށައިފައެވެ.

އަދި އެމްއާރްއެމް އިން ވަނީ ކޯލިޝަން ހެދުމަށް މަޝްވަރާތައް ފެށުމަށް އެއްބަސްވެފައެވެ.