ފުލުހުންގެ އިކޮނޮމިކް ކްރައިމް އިންވެސްޓިގޭޝަންގެ ހެޑް ސުޕްރިންޓެންޑެންޓް އޮފް ޕޮލިސް ރަޖުނީ ޝުއައިބު ވަގުތީ ގޮތުން މަސައްކަތުން އެކަހެރިކޮށްފިއެވެ.

ފުލުހުން ތަރުޖަމާނު އެސިސްޓެންޓް ކޮމިޝަނަރ އޮފް ޕޮލިސް އަހްމަދު ޝިފާން "އެކްސް" ގައި މިރޭ ކުރެއްވި ޕޯސްޓެއްގައި ވިދާޅުވީ ރަޖުނީ ކުރައްވަމުން ގެންދެވި މަސައްކަތްތައް ވަގުތީ ގޮތުން އެހެން ފަރާތަކާ ހަވާލުކޮށްފައިވާ ކަމަށެވެ. ޝިފާން ވިދާޅުވި ގޮތުގައި، އެ ބަދަލު ގެނައީ އިކޮނޮމިކް ކްރައިމް އިންވެސްޓިގޭޝަންސްގައި މި ވަގުތު ކުރަމުން ގެންދާ ބިންވެރިޔާ އަދި ގެދޮރުވެރިޔާ ސްކީމާ ގުޅޭ ތަހުގީގުގެ ކްރެޑިބިލިޓީ ހިފެހެއްޓުމަށާއި އެ ތަހުގީގަށް އެއްވެސް ކަމަކުން ނުރަނގަޅު އަސަރެއް ނުފޯރާނެކަން ޔަގީން ކުރުމަށެވެ.

ރަޖުނީ އަކީ "ބިންވެރިޔާ" ސްކީމުގެ ބޭރުން ގޯތިތަކެއް ދިން ކަމަށް ތުހުމަތުކުރެވޭ ކޮރަޕްޝަންގެ މައްސަލަ ތަޙުޤީޤުކުރާ ޓީމުގައި އިސްކޮށް ހިމެނިވަޑައިގަންނަވާ ބޭފުޅެކެވެ.

Advertisement

ސޯޝަލް މީޑިއާގައި އިއްޔެ އިން ފެށިގެން އަންނަނީ ރަޖުނީ އާއި އޭނާގެ އަންހެނުންނަށް ނުހައްގުން ފްލެޓް ލިބުނު ކަމަށް ބުނާ ޕޯސްޓުތަކެއް ދައުރު ކުރަމުންނެވެ. އެ ޕޯސްޓްތަކުގައި ބުނާގޮތުން ރަޖުނީއާއި އޭނާގެ އަންހެނުންނަށް ފްލެޓް ލިބުނީ ވިނަރެސް ފްލެޓްތަކުންނެވެ.