އަލް ހިޖްރަ ގްރޫޕުގެ ހަވާލުގައި އުމްރާގެ އަޅުކަން އަދާކުރުމަށް ރާއްޖެއިން ދިޔަ 24 މީހަކު އަނބުރާ ނާދެވި މައްކާގައި ތާށިވުމުން، އެ މީހުން ރާއްޖެ ގެނައުމުގެ މަސައްކަތް ސަރުކާރުން ފަށައިފި އެވެ.

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ މޯލްޑިވްސް ޙައްޖު ކޯޕަރޭޝަންގެ މެދުވެރިކޮށް، ހާލުގައި ޖެހުނު އުމްރާވެރިންނަށް އެހީވުމަށް މަސައްކަތް ކުރަމުންދާ ކަމަށާއި، މައްކާގައި ތާށިވި އުމްރާވެރިންނަށް މިރޭ ގުޅައި ހާލު ބަލާފައިވާ ކަމަށެވެ.

އުމްރާވެރިންނާ މެދު އިހްމާލުވި އަލްހިޖުރަ ގްރޫޕްގެ ވެރިންގެ މައްސަލަ ތަހުގީގުކޮށް ފިޔަވަޅު އަޅާނެ ކަމަށް ވެސް ޝަހީމް ވަނީ ވިދާޅުވެފަ އެވެ.

Advertisement

"ދިވެހި އެއްވެސް ރައްޔިތަކަށް ދިމާވާ ދަތި ކަމެއްގައި އެހީ ނުވެ އަޅުގަނޑުމެން ނުތިބޭނަން. ރައީސް މުއިއްޒު އަބަދުވެސް އިރުޝާދު ދެއްވަނީ ރައްޔިތުންނާ ގާތުން މަސައްކަތްކުރުމަށް. ދިމާވާ ކަންކަން ހައްލުކުރުމަށް،" ޝަހީމް ވިދާޅުވި އެވެ.

މިދިޔަ އަހަރުގެ ޑިސެންބަރާ ދިމާކޮށް އެކި ގުރޫޕުތަކުގެ ހަވާލުގައި 6،300 އަށް ވުރެ ގިނަ މީހުން އުމްރާގެ އަޅުކަން އަދާކުރަން ސައުދީ އަރަބިއްޔާއަށް ގޮސްފައިވެ އެވެ.