އިންޑިއާގެ ފިލްމީ ތަރި ސައިފް އަލީ ޚާނަށް ތޫނު އެެއްޗަކުން ހަމަލާދީ ޒަހަމްކުރި މައްސަލައިގައި އަދިވެސް ތުހުމަތު ކުރެވޭ މީހާ އަތުލައިގަނެފައި ނުވާ ކަމަށް ފުލުހުން ބުނެފި އެވެ.

ސައިފް ދިިރިއުޅޭ 12 ބުރީގެ އިމާރާތުގެ 11 ވަނަ ބުރީގައި އެ މީހުންގެ އެޕާޓްމަންޓެއް އިއްޔެ މެންދަމު 2:30 އެހާކަށްހާ އިރު ވަދެ، ހަމަލާދިން މީހާ، އެ ހަމަލާ އަށް ފަހު އިމާރާތުން ނުކުމެގެންދާ މަންޒަރު ފެންނަ ސީސީޓީވީ ފުޓޭޖުގެ މަންޒަރުތަކެއް ރޭ ފުލުހުން އާންމުކުރި އެވެ.

ނަމަވެސް އެ މީހާއާ ބެހޭ އިތުރު އެއްވެސް މައުލޫމާތެއް މިހާތަނަށް އަދި ހާމަކޮށްފައެއް ނުވެ އެވެ.

އެކަމަކު ހަމަލާ ދިން މީހާ އަކީ މީގެ ކުރިން ޝާހްރުކް ޚާންގެ ގެ "މަންނަތު" އިން ވައްކަން ކުރަން މަސައްކަތްކުރިކަމުގެ ތުހުމަތުތަކެއް ވެސް ކުރެވިފައި މީހެއް ކަމަށް ފުލުހުން ބުންޏެވެ.

ބައެއް މީޑިއާތަކުން ރިޕޯޓްކޮށްފައިވާ ގޮތުގައި ސައިފަށް ހަމަލާ ދިން މީހާ އަކީ އެ މީހުންގެ މެއިޑެއްގެ ގޮތުގައި މަސައްކަތްކުރާ މީހަކާ ހިތާވެގެން އުޅޭ މީހެކެވެ. އަދި އެ އެޕާޓްމަންޓަށް އެ މީހާ ވަނުމުގައި މެއިޑްގެ ބައިވެރިވުމެއް އޮތް ކަމަށް ބެލެވޭ ކަމަށް ބުނެފައިވެ އެވެ.

ނަމަވެސް އެ ވާހަކައިގެ ސައްހަކަމާ ގުޅޭ ގޮތުން ވެސް ފުލުހުން މިހާތަނަށް އެއްވެސް އެއްޗެއް ނުބުނެ އެވެ.

ސައިފަށް ހަަމަލާ ދިން މައްސަލައާ ގުޅުން ހުރި ކަމަށް ބެލެވިގެން މިއަދުގެ ވަރަށް ހެނދުނުގެ ވަގުތެއްގައި މީހަކު ފުލުހުންގެ ބެލުމުގެ ދަށަށް ގެންދިޔަ އެވެ. ފުލުހުން މިއަދު ހަވީރު ބުނީ އެ މީހާގެ ބަޔާނެއް ނެގުމަށް މިހާރު ދޫކޮށްލާފައިވާ ކަމަށާއި ހަމަލާއާ އެ މީހާއާ އެއްވެސް ގުޅުމެއް ނެތް ކަމަށެވެ.

އެ މީހާއާ ބެހޭ އިތުރު މައުލޫމާތެއް ވެސް ހާމައެއް ނުކުރެ އެވެ.

ތޫނު އެއްޗަކުން ދިން ސައިފްގެ ހަށިގަޑަނޑުގެ ހަ ތަނަކަށް ހަމަލާ ދީފައިވާ އިރު، މުމްބާއީގެ ލީލާވަތީ ހޮސްޕިޓަލްގައި އޭނަގެ ސާޖަރީއެއް އިއްޔެ ވަނީ ހަދައިފަ އެވެ. ސައިފްގެ ބުރަކައްޓަށް ހަރާލި 2.5 އިންޗީގެ ވަޅީގެ ތިލަ ސާޖަރީގެ ތެރޭގައި ނަގާފައިވާ އިރު، އޭނަގެ ހާލު މިހާރު ރަނގަޅު ކަމަށް ލީލާވަތީ ހޮސްޕިޓަލްގެ ޓީމުން ބުނެ އެވެ. އަދި ކުރިއަށް އޮތް ދެތިން ދުވަހުގެ ތެރޭގައި ހޮސްޕިޓަލުން ދޫކޮށްލާނެ އެވެ.

މަޝްހޫރު ބަތަލާ ކަރީނާ ކަޕޫރްގެ ފިރިމީހާ ސައިފަށް ދިން ހަމަލާއާ ގުޅިގެން ބޮލީވުޑްގެ ވަރަށް ގިނަ ބަޔަކު ކަންބޮޑުވުން ފާޅުކޮށް، އޭނަ އަށް އަވަސް ޝިފާއަކަށް އެދިފައިވެ އެވެ. އަދި ފިލްމީ ތަރިންނަށް މިހާރު މުމްބާއީގައި އެއްވެސް ރައްކާތެރި ކަމެއް ނެތް ކަމަށް ބުނެ، އިންޑަސްޓްރީގެ ވަރަށް ގިނަ ބަޔަކު އަންނަނީ ކަންބޮޑުވުން ވެސް ފާޅުކުރަމުންނެވެ.