ބެލުންތެރިންގެ ބޮޑު ތަރުހީބެއް ލިބުނު އިންޑިއާގެ ފިލްމު "ޕުޝްޕާ 2: ދަ ރޫލް" ނެޓްފްލިކްސް އަށް އަންނަން ތައްޔާރުވެއްޖެ އެވެ.

އެ ޕްލެޓްފޯމުން މިކަން އިއުލާންކޮށް ބުނީ ވަރަށް އަވަހަށް ފިލްމު ޕްރީމިއާކުރާނެ ކަމަށެވެ. އެގޮތުން އެންމެ ފުރަތަމަ "ޕުޝްޕާ 2" ސްޓްރީމީން އަށް ދޫކޮށްލަން ހަމަޖެހިފައި ވަނީ ތެލެގޫ، ތަމަޅަ، މަލަޔާޅަމް އަދި ކަންނާޑާ ބަހުންނެވެ.

ބެލެވޭ ގޮތުން އަދި ތަންކޮޅެއް ފަހުން ހިންދީ ބަހުން ވެސް ފިލްމު ސްޓްރީމިން އަށް ދޫކޮށްލާނެ އެވެ. ސިނަމާތަކުގައި "ޕުޝްޕާ 2" ހިންދީ ބަހުން ޑަބްކޮށްގެން ވެސް ދައްކާފައިވެ އެވެ

Advertisement

މިދިޔަ މަހުގެ 5 ގައި ރިލީޒްކޮށް ބޮކްސް އޮފީހުގައި 1،800 ކްރޯޑް ރުޕީސް (208.1 މިލިއަން ޑޮލަރު) ގެ އާމްދަނީއެއް ހޯދި ފިލްމު ހެދީ 500 ކްރޯޑް ރުޕީސް (58 މިލިއަން ޑޮލަރު) ގެ ބަޖެޓަކުންނެވެ.

"ޕުޝްޕާ 2" އަކީ ޑައިރެކްޓަރު ސުކްމާރު ލިޔެ، ޑައިރެކްޓްކޮށް 2021 ގައި ގެނެސްދިން "ޕުޝްޕާ: ދަ ރައިޒް" ގެ ސީކްއެލް އެވެ. މިއީ ޓްރިލޮޖީއަކަށްވާތީ ދެން އޮތީ ފިލްމުގެ ތިން ވަނަ ބަ އެވެ. އެކަމަކު އެ ގެނެސްދޭނެ އިރެއް އަދި އިއުލާނެއް ނުކުރެ އެވެ.

"ޕުޝްޕާ" ގެ ޓައިޓްލް ރޯލު ކުޅެފައި ވަނީ މަޝްހޫރު ތެލެގޫ އެކްޓަރު އައްލޫ އެވެ. މީގެ ފުރަތަމަ ބައިން އޭނަ އަށް އެންމެ މޮޅު އެކްޓަރުގެ ނެޝަނަލް އެވޯޑް ވެސް ލިބިފައިވެ އެވެ.

"ޕުޝްޕާ" ގެ ދެ ފިލްމުގެ ވެސް ލީޑް ބަތަލާ އަކީ ރަޝްމިކާ މަންދަނާ އެވެ.