05 އޭޕްރީލު 2025

Advertisement

މެންބަރު ސިނާން ދަރަނި ދައްކައިފި

15 ފެބްރުއަރީ 2025

އައްޑޫ ހިތަދޫ އުތުރު ދާއިރާގެ މަޖިލިސް މެންބަރު ހުސައިން ސިނާން ހުކުމާ އެއްގޮތަށް ސާބިތު ދަރަންޏެއް ނުދައްކާތީ އޭނަގެ ގޮނޑި ގެއްލިފައިވާ ކަމަށް ބުނެ ސުޕްރީމް ކޯޓަށް މިދިޔަ ހަފުތާގައި މައްސަލައެއް ހުށަހެޅުމުން ދަރަނި ދައްކައިފި އެވެ.

ބަޔަކާ ގުޅިގެން މޯލްޑިވްސް އިސްލާމިކް ބޭންކް (އެމްއައިބީ) އިން ސިނާން ނެގި 3.8 މިލިއަން ރުފިޔާގެ ލޯނު، އެއްބަސްވުމާ އެއްގޮތަށް ނުދައްކާތީ އެ ފައިސާ ހޯދަން ހިތަދޫ މެޖިސްޓްރޭޓް ކޯޓަށް ހުށަހެޅި މައްސަލައިގައި މިދިޔަ އަހަރުގެ އޮކްޓޯބަރު 14 ގައި ހުކުމް ކުރީ އެ ތާރީހާ ހަމައަށް ދައްކަން އޮތް 2.5 މިލިއަން ރުފިޔާ ހަ މަހަށް ބަހާލައިގެން ދެއްކުމަށެވެ.

ނަމަވެސް އެ މުއްދަތު ހަމަވި އިރު ވެސް ފައިސާ ނުދައިގެން މައްސަލަ ސުޕްރީމް ކޯޓަށް ހުށަހެޅީ މިދިޔަ ހަފުތާގެ ފަހުކޮޅު ހުށަހެޅީ ޣާލިބު ސަލީމް ކިޔާ މީހެކެވެ.

Advertisement

ސިނާން ދައްކަން ޖެހޭ ދަރަނި މިހާރު ދައްކާފައިވީ ނަމަވެސް މިކަމާ ގުޅޭ ގޮތުން އޭނަ މިހާތަނަށް ރަސްމީކޮށް އެއްވެސް އެއްޗެއް ވިދާޅެއް ނުވެ އެވެ.

ގާނޫނުއަސާސީގެ 73 ވަނަ މާއްދާގައިވާ ގޮތުން ދައްކަން ޖެހޭ ސާބިތު ދަރަންޏެއް އޮވެ، ހުކުމާ އެއްގޮތަށް އެ ދަރަނި އަދާކުރަމުން ނުދިއުމާއި މަޖިލީހުގެ މެންބަރު ކަމަށް ވާދަ ވެސް ނުކުރެވޭނެ އެވެ. އަދި މެންބަރެއްގެ ގޮތުގައި ހުންނަވަނިކޮށް އެފަދަ ހާލަތެއް މެދުވެރި ވެއްޖެ ނަމަ މެންބަރުކަމުގެ ޝަރުތު ވެސް ގެއްލޭނެ އެވެ.

Advertisement

ކޮމެންޓް