ރާއްޖެ ޓްރާންސްޕޯޓް ލިންކް (އާރްޓީއެލް) ފެރީ ނިޒާމާ ގުޅިގެން ޚިދުމަތަށް ހާއްސަކޮށްގެން ހަދާފައިވާ ފެރީ ސްޕޮޓްތަކާއި، ޓާމިނަލްތައް ކައުންސިލްތަކާ ހަވާލު ކުރަން ނިންމާފައިވާތީ އެތަންތަން ލޯކަލް މިނިސްޓްރީއާ ޙަވާލުކޮށްފި އެވެ.

އެ ތަންތަން މިނިސްޓްރީއާ ހަވާލުކުރީ މިއަދު ވިލާ ކޮލެޖުގެ ހޯލުގައި އެ ކަމަށް ޓަކައި ބޭއްވި ޚާއްޞަ ހަފުލާއެއްގަ އެވެ.

ޓާމިނަލްތަކާ ހަވާލުވުމުގެ އެއްބަސްވުމުގައި ޓްރާންސްޕޯޓް މިނިސްޓްރީގެ ފަރާތުން ސޮއިކުރެއްވީ، ޕާމަނަންޓް ސެކްރެޓަރީ ފާޠިމަތު ޝަހާން މުޙައްމަދެވެ. އެމްޓީސީސީގެ ފަރާތުން ސޮއިކުރެއްވީ ޖެނަރަލް މެނޭޖަރު ޢަލީ ފާޠިޙެވެ. ލޯކަލް މިނިސްޓްދީގެ ފަރާތުން ސޮއިކުރެއްވީ ޕާމަނަންޓް ސެކްރެޓަރީ ޑޮކްޓަރ ފާޠިމަތު މުނާ އެވެ.

Advertisement

މިއަދު ޙަވާލުކުރީ ޒޯން 1 ގައި ހިމެނޭ ހއ. އަތޮޅާއި، ހދ. އަތޮޅާއި އަދި ށ. އަތޮޅުގައި ހަދާފައިވާ 21 ތަނެކެވެ.

މިނިސްޓްރީން ބުުނީ ހިދުމަތް ހޯދާ ފަރާތްތަކަށް އެ ތަންތަން ބޭނުންކުރުމުގެ މަގު ފަހިކޮށްދީ، އެ ތަންތަނުގެ އެންމެހައި ކަންކަން ގާތުން ބެލެހެއްޓުމުގެ ފުރުޞަތު ކައުންސިލްތަކަށް ލިބި، އަދި އެ ތަންތަނުން މާލީ މަންފާތައް ލިބިގަތުމުގެ ޙައްޤު ކައުންސިލްތަކަށް ލިބިގެން ދާނެ ކަމަށެވެ.

ރަސްމިއްޔާތުގައި ލޯކަލް މިނިސްޓަރު އާދަމް ޝަރީފު ވިދާޅުވީ ފެރީ ސްޕޮޓްތަކާއި، ޓާމިނަލްތައް ހަމަޖެހިގެން އެ ދިޔައީ ކައުންސިލްތަކުން ރައީސް ޑރ. މުހައްމަދު މުއިއްޒަށް ދީފައިވާ ޚިޔާލާ ގުޅިގެން ކަމަށެވެ. އަދި ކުރިއަށް އޮތް ތިން މަހެއްހާ ދުވަހުގެ ތެރޭގައި މިކަމާ ގުޅިގެން ފުރިހަމަ ކުރަން ޖެހޭ އިޖުރާއަތްތައް ފުރިހަމަކޮށް ކައުންސިލްތަކާ ތަންތަން ޙަވާލު ކުރައްވާނެ ކަމަށް މިނިސްޓަރު ވިދާޅުވި ވިދާޅުވި އެވެ.

ކައުންސިލްތަކާ ފެރީ ޓާމިނަލްތައް ހަވާލު ކުރައްވާނެ ކަމަށް ރައީސް ވިދާޅުވީ މިދިޔަ މަހުގެ ހއ. އަތޮޅަށް ކުރެއްވި ދަތުރުގެ ތެރޭގަ އެވެ.

މިހާރު އާރުޓީއެލް ފެރީގެ ޚިދުމަތް ރާއްޖޭގެ ނުވަ އަތޮޅެއްގެ މީހުން ދިރިއުޅޭ 81 ރަށަކަށާއި، އެއާޕޯޓް ހަދާފައިވާ ތިން ރަށަކަށް އަންނަނީ ދެމުންނެވެ. މި ހިދުމަތް 2022 އިން ފެށިގެން ދެމުން އަންނަނީ އެމްޓީސީސީއާ ހަވާލުކޮށްގެންނެވެ.