ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ޗެއާމަން އަހުމަދު ނާސިފް މިއަދު އެ މަގާމުން ވަކިކޮށް އެހެން ކުންފުންޏަކަށް ބަދަލުކޮށްފިި އެވެ.

ޕީސީބީން ބުނީ ނާސިފު އެޗްޑީސީން ވަކިކޮށް މިހާރު ވެމްކޯގެ ޗެއާމަންގެ މަގާމަށް އައްޔަންކޮށްފައިވާ ކަމަށެވެ.

ނަމަވެސް އެޗްޑީސީން ނާސިފު ވަކިކުރި ސަބަބެއް ނޭނގެ އެވެ. "ބިންވެރިޔާ" ސްކީމްގެ ދަށުން ގޯތީގެ ވަގު މުއާމަލާތްތަކެއް އެޗްޑީސީން ހިންގި ކަމަށް ތުހުމަތު ކުރެވޭ މައްސަލަތަކެއް މިދިޔަ އަހަރުގެ ފަހުކޮޅު ފެންމަތިވެ، ބޯޑުގެ ގިނަ މެންބަރުން ވަގުތީ ގޮތުން ސަސްޕެންޑްކުރި އިރު، ނާސިފަށް އޭރު އެއްވެސް ފިޔަވަޅެއް އަޅައިފައެއް ނުވެ އެވެ.

Advertisement

ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރްއޭސީއެލް) ގެ ޗެއާމަންކަން ވެސް ކުރެއްވި ނާސިފް އެޗްޑީސީގެ ޗެއާމަނަކަށް އައްޔަންކުރީ މިދިޔަ އަހަރު ނޮވެމްބަރު މަހުގެ ތެރޭގަ އެވެ. އޭނަ އަކީ ކުރީގެ ރައީސް ޔާމީނުގެ ސަރުކާރުގައި ނާސިފް ތިލަފުށި ކޯޕަރޭޝަން ލިމިޓެޑް (ޓީސީއެލް) ގެ މެނޭޖިން ޑިރެކްޓަރުގެ މަގާމާއި ގްރޭޓާ މާލެ އިންޑަސްޓްރިއަލް ޒޯން ލިމިޓެޑްގެ މެނޭޖިން ޑިރެކްޓަރުކަން ވެސް ކުރެއްވި ބޭފުޅެކެވެ.

އައްޑޫ ހުޅުދު އަށް ނިސްބަތްވާ ނާސިފު ކުރިން އެޗްޑީސީގެ މެނޭޖިން ޑިރެކްޓަރުގެ މަގާމު ވެސް އަދާކުރެއްވި އެވެ.