ސިޔާސީ ފަރާތްތަކުގެ އާއިލާތަކަށް ހަމަލާތައް ދިނުން ހުއްޓާލަންޖެހޭ ކަމަށް ކުރީގެ ރައީސް ޑރ. މުހައްމަދު ވަހީދު ހަސަން މަނިކު ވިދާޅުވެއްޖެ އެވެ.

ރާއްޖޭގައި ވޭޕް މަނާކޮށްފައި ވަނީ، ރައީސް ޑރ. މުހައްމަދު މުއިއްޒުގެ ދަރިކަލުން އުމައިރު އެތަކެތި ބޭނުންކުރާތީ ކަމަށް ބުނެ އެމްޑީޕީ މުޒާހަރާއެއްގެ ތެރެއިން އެ ޕާޓީގެ އެކްޓިވިސްޓެއް ކަމަށްވާ މަރިޔަމް ޒުބައިރު (މަންދީ) ތުހުމަތުކުރި މައްސަލަ ވަނީ ހޫނުވެފަ އެވެ.

އެކްސްގައި ކުރެއްވި ޕޯސްޓެއްގައި ވަހީދު ވިދާޅުވީ ކުޑަކުދިން ސިޔާސީ ހަމަނުޖެހުންތަކުގެ ތެރެއަށް ވެއްދުމަކީ ގަބޫލުކުރެވޭނެ ކަމެއް ނޫން ކަމަށެވެ. އަދި ސިޔާސީ ފަރާތްތަކުގެ އާއިލާތަކަށް ހަމަލާތައް ދިނުން ސިޔާސީ ސަގާފަތުގެ ބައެއްގެ ގޮތުގައި އޮންނަތާ ދުވަސްކޮޅެއް ވެފައިވާ ކަމަށާއި މިފަދަ ކަންކަން ހުއްޓަލަންވީ ވަގުތު މިހާރު ޖެހިފައިވާ ކަމަށް ވަހީދު ވިދާޅުވި އެވެ.

Advertisement

ވަހީދު ވަނީ ރައީސް މުޢިއްޒުގެ ދަރިކަލުންނަށް ފަހަކަށް އައިސް ދެވުނު މިފަދަ ހަމަލާ ކުށްވެރިކުރައްވާފަ އެވެ.

މި ވާހަކަތަކާއި ގުޅިގެން ރައީސްގެ އާއިލާގެ ފަރާތުން ވަނީ މަންދީ އާއި އެމްޑީޕީގެ ޗެއާޕާސަން ފައްޔާޒް އިސްމާއީލާއި އެ ޕާޓީގެ މައްޗަށް ދައުވާކުރަން ނިންމާފަ އެވެ.

މ. ދިމްޔާތުގައި އެކަމާ ގުޅޭ ގޮތުން މިއަދު ބޭއްވި ނިއުސް ކޮންފަރެންސެއްގައި ރައީސްގެ އާއިލާގެ ގާނޫނީ ޓީމުގައި ހިމެނިވަޑައިގަންނަވާ އިސް ގާނޫނީ ވަކީލު އާޒިމާ ޝަކޫރު ވިދާޅުވީ އެ ފަރާތްތަކާމެދު ދައުވާކުރައްވަން ނިންމަވައި، އެޅުއްވި މި ފިޔަވަޅަކީ މަންމައެއްގެ ހައިސިއްޔަތުން ކުދިންގެ ރައްކާތެރިކަމަށްޓަކައި އަޅުއްވަން ޖެހިވަޑައިގެންނެވި ފިޔަވަޅެއް ކަމަށެވެ.