އިމިގްރޭޝަން ކޮންޓްރޯލަރުގެ މަގާމަށް ކުރީގެ ޕޮލިސް ކޮމިޝަނަރު (ސީޕީ) އަހުމަދު ފަސީހު އައްޔަން ކުރައްވައިފި އެވެ.

ފަސީހު އެ މަގާމަށް އައްޔަންކުރައްވައިފައިވަނީ ސްޓޭޓް މިނިސްޓަރު ފެންވަރުގަ އެވެ.

ރައީސް ޑރ. މުހައްމަދު މުއިއްޒު، އިމިގްރޭޝަން ކޮންޓްރޯލަރުގެ މަގާމަށް ފަސީހު އައްޔަން ކުރެއްވީ، އެ މަގާމު ފުރުއްވަމުން ގެންދެވި މުހައްމަދު ޝަމްއާން ވަހީދު ވަކިކުރެއްވުމަށްފަހު އެވެ. ނަމަވެސް މަގާމުން އޭނާ ވަކިކުރި ސަބަބެއް އެނގިފައެއް ނުވެ އެވެ.

Advertisement

ޝަމްއާން މަގާމުން ވަކިކުރިއިރު ފުލުހުން މިރޭ ވަނީ، މޯލްޑިވްސް އިމިގްރޭޝަންގެ ބައެއް މުވައްޒަފުން މަގާމުގެ ނުފޫޒު ބޭނުންކޮށްގެން ބިދޭސީންގެ އަތުން ނާޖާއިޒް މަންފާ ހޯދަމުންދާ ކަމުގެ މައުލޫމާތު ލިބިގެން އެކަމާ ގުޅޭ ތަހުގީގެއް ފަށާފައިވާކަން ހާމަކޮށްފަ އެވެ.

މި މައްސަލައާ ގުޅިގެން ރޭ މާލޭ ގެއެއް ބަލައި ފާސްކޮށް ތިން މީހަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ފުލުހުން ވަނީ ބުނެފަ އެވެ.

އިމިގްރޭޝަން ކޮންޓްރޯލްގެ މަގާމަށް ޝައްމާން އައްޔަންކުރީ 2023، ނޮވެމްބަރު 19 ގަ އެވެ. އޭނާ އަކީ މީގެކުރިން ވެސް ގިނަ ދުވަސްތަކެއް ވަންދެން އިމިގްރޭޝަނުގައި ވަޒީފާ އަދާކުރި ފަރާތެކެވެ.