ސިނގިރޭޓް ފިލްޓަރު ނިއްވާނުލައި އެއްލައިލުމުގެ ސަބަބުން ހިޔާގައި އަލިފާނުގެ ދެ ހާދިސާއެއް ހިނގާފައިވާތީ އެގޮތަށް އަމަލުކުރާކަން ފާހަގަކުރެވޭނަމަ ފިޔަވަޅު އަޅާނެ ކަމަށް އާބަން ކޯއިން ބުނެފިއެވެ.

އެ ކުންފުނިން ބުނެފައިވާ ގޮތުގައި ރޭގެ އަލިފާނުގެ ހާދިސާވެސް ހިނގީ ސިނގިރޭޓު ފިލްޓަރެއްގެ ސަބަބުން ކަމަށް ބެލެވެއެވެ. އަލިފާން ރޯވީ ހިޔާ ފުލެޓުގެ ހަތްވަނަ ޓަވަރުގެ އެޕާޓްމެންޓެއްގެ ބެލްކަނީގައެވެ. އެ ހާދިސާގައި އެއްވެސް މީހަކަށް އަނިޔާވެފައެއް ނުވެއެވެ. 

އެކަމާ ގުޅިގެން އާބަންކޯ އިން ނެރުނު ނޫސްބަޔާނެއްގައި ބުނީ ހިޔާގެ ފުލެޓުތައް ދޫކޮށްފައިވަނީ އެއްބަސްވުމެއްގެ ދަށުން ކަމަށާއި އެއްބަސްވުމުގައި އާންމުންގެ ސަލާމަތާއި ރައްކާތެރިކަން ގެއްލޭނެ ފަދަ އެއްވެސް އަމަލެއް ކުރުމާއި އުނދަގޫވާނެ ކަންކަން ކުރުމަކީ މަނާކަމެއް ކަމަށް ބަޔާންކޮށްފައިވާނެ ކަމަށެވެ. އެގޮތުން، ސިނގިރޭޓު ބުއިމާއި، އަލިފާން ރޯކުރުމާއި، އިމާރާތަށް ގެއްލުން ދިނުން، ބެލްކަނީގައި ނުވަތަ ކޮރިޑޯގައި ވޭޕްކުރުމާއި ސިނގިރޭޓު ބުއިން އަދި އަޅި ކެނޑުމަކީވެސް އެއްބަސްވުމުގެ ދަށުން މަނާކަމެއް ކަމަށް އެ ކުންފުނިން ބުންޏެވެ.

Advertisement

އެކަންކަމާ ހިލާފުވާ ފަރާތްތަކަށް އެއްބަސްވުމުގެ ދަށުން ފިޔަވަޅު އެޅޭނެ ކަމަށް އާބަންކޯއިން ބުންޏެވެ. އެގޮތުން، އެއްބަސްވުމާ ހިލާފުވެފައިވާ މިންވަރަށް ބަލައި 1،000 ރުފިޔާ އާއި 100،000 ރުފިޔާއާ ދެމެދުގެ އަދަދަކުން ޖޫރިމާނާ ކުރެވޭނެ ކަމަށާއި މިފަދަ ހާދިސާތައް ތަހުގީގުކުރުމަށްފަހު ރައްޔިތުންގެ ސަލާމަތަށް އިހުމާލުވެފައިވާ ފަރާތްތަކުގެ ޔުނިޓް އަތުލުމުގެ ފުރުސަތުވެސް އޮންނާނެ ކަމަށް އެ ކުންފުނިން ބުންޏެވެ.

މި ރޯދަ މަހު ހިޔާގައި ހިނގި އަލިފާނުގެ ދެ ހާދިސާއަކީ ބައެއްގެ އިހުމާލުން ހިނގި ހާދިސާއެއްކަން ކުންފުނިން ބެލިބެލުމުން އެނގިފައިވާ ކަމަށާއި މިއީ އިހުމާލުގެ ސަބަބުން ހިނގި ދެވަނަ ހާދިސާ ކަމަށް ވެސް އާބަންކޯއިން ބުންޏެވެ. އަދި އެ ދެ ހާދިސާވެސް ހިނގާފައިވަނީ މި ރޯދަ މަހު ކަމަށާއި ދެ ހާދިސާ ހިނގީ ސިނގިރޭޓު ފިލްޓަރު ނިއްވާނުލައި އެއްލައިލުމުގެ ސަބަބުންކަމަށް އާބަންކޯއިން ބުންޏެވެ.

‏