ރިޔާސީ އިންތިހާބު 2023 ގައި ވާދަކުރެއްވި 8 ކެންޑިޑޭޓުންގެ މާލީބަޔާން އިލެކްޝަންސް ކޮމިޝަނުން އާންމުކޮށްފިއެވެ. ބަޔާނުގައި ބުނާގޮތުން ރިޔާސީ އިންތިހާބުގެ ކެމްޕެއިނަށް އެންމެ ގިނައިން ފައިސާ ޚަރަދުކޮށްފައިވަނީ ޖުމްހޫރީ ޕާޓީންނެވެ.

އީސީގެ ނައިބު ރައީސް އިސްމާއީލް ހަބީބް ކުރެއްވި ޓްވީޓެއްގައި ވިދާޅުވެފައިވަނީ ރިޔާސީ އިންތިހާބު 2023 ގައި ވާދަކުރެއްވި 8 ކެންޑިޑޭޓުންގެ މާލީބަޔާން އެ ކޮމިޝަނުގެ ވެބްސައިޓުގައި އާންމު ކުރައްވާފައިވާ ކަމަށެވެ.

ރިޔާސީ އިންތިހާބުގެ ފުރަތަމަ ބުރުގައި ވާދަކުރެއްވި އަށް ކެންޑިޑޭޓުންނަށް ފައިސާ އަދި ތަކެތީގެ ގޮތުގައި 74،752،317ރ. ލިބުނެވެ. އޭގެ ތެރެއިން، ކެމްޕެއިނަށް އެ ބޭފުޅުން 46،404،531ރ. ހަރަދުކުރި އެވެ. ކެނޑިޑޭޓުންގެ މާލީ ބަޔާނުން ދައްކާގޮތުން ރިޔާސީ އިންތިހާބުގައި ވާދަކުރެއްވި ކެނޑިޑޭޓުން ވަނީ 46 މިލިޔަން ރުފިޔާ ކެމްޕެއިނަށް ޚަރަދުކޮށްފައެވެ.

މލީ ބަޔާނުގައި ބުނާގޮތުން:

1. ޖުމްހޫރީ ޕާޓީ - 20،421،050ރ. ހަރަދުކުރިއިރު އޭގެ ތެރެއިން، ވިލާ ޝިޕިން ކުންފުނިން 10 މިލިއަން އަދި ވިލާ ހަކަތައިން އެ ކެމްޕެއިނަށް ފަސް މިލިއަން ރުފިޔާ ދީފައިވެއެވެ.

2. އެމްއެންޕީން - 13،076،203ރ. ލިބުނުއިރު، އޭގެން ބާކީ ވީ އެންމެ 303 ރުފިޔާއެވެ.

3. ޑިމޮކްރެޓްސް - 2،529،179ރ. ލިބުނުއިރު، ހަރަދުކުރީ 2،518،508 މިލިއަން ރުފިޔާ އެވެ.

4. އަމިއްލަ ގޮތުން ވާދަކުރެއްވި ހަސަން ޒަމީލު - 15،500ރ. ލިބުނުއިރު އޭގެ އިތުރަށް، ލިބުނު 11،259ރ. އާއެކު، ފައިސާ އާއި ތަކެތީގެ އަގު 26،759ރ. އަށް އަރަ އެވެ. ހަރަދުކޮށްފައިވަނީ 16،259ރ. އެވެ.

5. ފާރިސް މައުމޫން - 1,167,933ރ. ލިބުނުއިރު ހަރަދުކުރީ 1،166،064ރ. އެވެ.

6. ކުރީގެ ހޯމް މިނިސްޓަރު އުމަރު ނަސީރު - 286،950ރ. އަދި ލިބުނު ތަކެތީގެ އަގު 35،000ރ. ޖުމްލަ 321،950ރ. ލިބުނެވެ. ނަމަވެސް، ކެމްޕެއިނަށް ހަރަދުކުރީ 285،950ރ. އެވެ.

7. ކުރީގެ ރައީސް އިބްރާހިމް މުހައްމަދު ސޯލިހު - 10،500،276ރ. ލިބުނުއިރު އޭގެ ތެރެއިން 6،885،350ރ. ހަރަދުކުރި އަދި 24،149ރ. ބާކީވެފައިވެ އެވެ.

8. ރައީސް ޑރ.މުހައްމަދު މުއިއްޒު - 2،115،000ރ. ލިބުނުއިރު އޭގެ އިތުރުން އިންތިހާބަށް ލިބުނު ތަކެތީގެ އަގު 19،229،367ރ. އަށް އަރާތީ، އިންތިހާބަށް ފައިސާ އަދި ތަކެތީގެ ގޮތުގައި ޖުމްލަ 21،334،367ރ. ލިބިފައިވެ އެވެ. އެކަމަކު، އެ މަނިކުފާނު ހަރަދު ކުރި ކަމަށް މި ރިޕޯޓުގައި ބުނެފައިވަނީ 1،999،450ރ. އެވެ. ބާކީވީ 115،550ރ. އެވެ.

އިންތިހާބާ ގުޅިގެން ކެންޑިޑޭޓުންނަށް ހަރަދުކުރެވޭނީ، ވޯޓުދިނުމުގެ ހައްގު ލިބިފައިވާ ކޮންމެ މީހަކަށް 2،000ރ. ގެ ރޭޓުންނެވެ. މި އިންތިހާބުގައި 282،395 މީހުންނަށް ވޯޓު ދިނުމުގެ ހައްގު ލިބިފައިވުމުން، ކެންޑިޑޭޓަކަށް އެންމެ ގިނައިން ހަރަދުކުރެވޭނީ 564،790،00ރ. އެވެ.

ކޮންމެ އިންތިހާބަކަށްފަހު، އެ އިންތިހާބެއްގައި ވާދަކުރި ކޮންމެ ކެންޑިޑޭޓެއް، ގާނޫނުގައި ބަޔާންކޮށްފައިވާ މައުލޫމާތާއި ތަކެތި ހިމެނޭ މާލީ ބަޔާނެއް ތައްޔާރުކޮށް، އެ އިންތިހާބެއް ބާއްވާތާ އެއް މަސްދުވަހުގެ ތެރޭގައި އިލެކްޝަންސް ކޮމިޝަނަށް ހުށަހަޅަން ޖެހޭ ގޮތަށް އިންތިހާބީ ގާނޫނަށް ގެނައި އިސްލާހު ރައީސުލްޖުމްހޫރިއްޔާ ވަނީ ވަރަށް ފަހުން ތަސްދީގު ކުރައްވާފައެވެ.

ރިޔާސީ އިންތިހާބު 2023 ގެ ފުރަތަމަ ބުރުގައި ވާދަކުރެއްވި ކެންޑިޑޭޓުންގެ ތެރެއިން، މާލީ ބަޔާން ހުށަހަޅުއްވަން ޖެހިވަޑައިގަންނަވާ ހުރިހާ ކެންޑިޑޭޓުންވެސް ވަނީ ހުށަހަޅުއްވަން ޖެހޭ ވަގުތަށް މާލީ ބަޔާން ވަނީ ހުށަހަޅުއްވާފައެވެ. އަދި ‏ދެ ވަނަ ބުރުގެ ކެންޑިޑޭޓުންގެ މާލީ ބަޔާންވެސް މިހާރު ވަނީ އީސީއަށް ހުށަހަޅުއްވާފައެވެ.