މާލެ ސަރަހައްދުގައި ދިރިއުޅޭ ހުރިހާ އެންމެނަށް މި ފަސްއަހަރުތެރޭ ބޯހިޔާވަހިކަން ފޯރުކޮށްދޭނެ ކަމަށް ހައުސިން މިނިސްޓަރު އަލީ ހައިދަރު މިއަދު ވިދާޅުވެއްޖެއެވެ.

ފަހި ދިރިއުޅުން ކޯޕަރޭޝަން (އެފްޑީސީ) ގެ "އަމާން ދޯދި" ގެ މޮޑެލް އެޕާޓްމެންޓް ދައްކާލުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ހައިދަރު ވިދާޅުވީ މި ސަރުކާރުގެ އަމާޒަކީ މާލެ ސަރަހައްދުގައި ދިރިއުޅޭ ހުރިހާ ރައް ޔިތުންނަށް މި ސަރުކާރުން ބޯހިޔާވަހިކަން ފޯރުކޮށްދިނުން ކަމަށެވެ.

ހައިދަރު ވިދާޅުވީ ކުރީ ސަރުކާރުން ކުރިޔަށް ގެންދިޔަ "ގެދޮރުވެރިޔާ" ސްކީމްގެ ދަށުން 4000 ފަރާތަކަށް ބޯހިޔާވަހިކަން ލިބިގެންދާއިރު މި ސަރުކާރުންވެސް އިތުރު ފުރުސަތު ތަކެއް ހުޅުވާލައިގެން ބޯހިޔާވަހިކަން ފޯރުކޮށްދޭނެކަމަށެވެ.

ހުޅުމާލޭގެ އިތުރުން ގުޅިފަޅާއި ގިރާވަރުފަޅުން ވެސް ކުރުމުއްދަތުގެ ގެދޮރުވެރިކަމުގެ ގިނަ ފުރުސަތުތައް ހުޅުވާލެވޭއިރު ފުށުދިއްގަރު ފަޅު ހިއްކަނީ ކުރިއަށް އޮތް 20 އަހަރަށް ބޭނުންވާ ބޯހިޔާވަހިކަން ހަމަޖެއްސުމަށް ކަމަށް އޭނާ ވަނީ ވިދާޅުވެފައެވެ.

ފުށުދިއްގަރު ފަޅު ހިއްކުމުގެ މަޝްރޫޢަކީ ރައީސް މުއިއްޒުގެ ވައުދުފުޅެކެވެ. މި މަޝްރޫއަށް ބޭނުންވާ ބަޖެޓް އަންނަ އަހަރުގެ ބަޖެޓުގައި ހިމެނި ނަމަވެސް އެމްޑީޕީން ވަނީ ކޮމިޓީ މަރުހަލާގައި ބަޖެޓުން އެ މަޝްރޫޢު އުނިކޮށްފައެވެ.

ފަހި ދިރިއުޅުން ކޯޕަރެޝަން (އެފްޑީސީ)ގެ "އަމާން ދޯދި" ޓަވަރުތަކުގެ އެޕާޓްމަންޓުތައް ހުންނާނެގޮތް ވަޒީރު ހައިދަރު އާއި ކޮންސްޓްރަކްޝަން މިނިސްޓަރު ޑރ. މުއްތަލިބާއި އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް މިއަދު ވަނީ ބައިވެރިވެވަޑައިގެންނެވިއެވެ.