އައްޑޫ ސިޓީ ހިތަދޫ ރީޖަނަލް ޕޯޓުގެ މަސައްކަތްތައް ކުރިއަށް ގެންދާގޮތް ބައްލަވާލައްވައި، މުވައްޒަފުންނާއި ބައްދަލުކުރުމުގެ ގޮތުން މޯލްޑިވްސް ޕޯޓް ލިމިޓެޑް (އެމްޕީއެލް)ގެ ސީއީއޯ މުހައްމަދު ވަޖީހް އިބްރާހިމާއި ސީނިއާރ މެނޭޖްމަންޓްގެ ޓީމެއް ހިތަދޫ ރީޖަނަލް ޕޯޓަށް ޒިޔާރަތްކުރައްވައިފިއެވެ.

މިއީ އެމްޕީއެލްގެ ސީއީއޯގެ މަގާމާ ހަވާލުވެވަޑައިގަތް ފަހުން، ހިތަދޫ ރީޖަނަލް ޕޯޓަށް ވަޖީހް ކުރެއްވި ފުރަތަމަ ޒިޔާރަތެވެ.

މި ޒިޔާރަތުގައި ސީއީއޯ ވަޖީޙް ވަނީ ހިތަދޫ ރީޖަނަލް ޕޯޓްގެ މަސައްކަތްތައް ކުރިއަށްދާގޮތް ބައްލަވާލައްވައި، އެ ޕޯޓުގެ ހާލަތާ ގުޅޭ މައުލޫމާތުތައް ހޯއްދަވައިފައެވެ.

ސީއީއޯ ވަޖީހް ވަނީ ހިތަދޫ ރީޖަނަލް ޕޯޓުގެ މުވައްޒަފުންނާ ބައްދަލުކުރައްވައި، އެ މުވައްޒަފުންގެ ވާހަކަތައް އަޑުއައްސަވައި، ހިތަދޫ ރީޖަނަލް ޕޯޓްގެ މަސައްކަތްތައް އިތުރަށް ހަރުދަނާކުރުމާ ގުޅޭގޮތުން މަޝްވަރާކުރައްވައިފައެވެ.

މި ދަތުރުގެ ތެރެއިން ވަޖީހް ވަނީ ހިތަދޫ ރީޖަނަލް ޕޯޓުގައި ކުރިއަށް ގެންދިޔަ އެމަރޖެންސީ އިވެކުއޭޝަން ޑްރިލް ބައްލަވާލައްވައިފައެވެ. މި ޑްރިލްއަކީ އެމްޕީއެލްގެ ޕޯޓުތަކުގެ ސަލާމަތާއި ރައްކާތެރިކަމާއި ކުއްލި ހާލަތްތަކުގެ ތައްޔާރީތައް ހަރުދަނާކުރުމަށް މެދުކެނޑުމެއްނެތި މި ކުންފުނިން ކުރަމުންދާ މަސައްކަތުގެ ތެރެއިން ކުރިއަށް ގެންދިޔަ ޑްރިލްއެކެވެ. މި ޑްރިލް ކުރިއަށް ގެންދިޔައީ އެމްޕީއެލްގެ ހެލްތު އެންޑް ސޭފްޓީ ޑިޕާޓްމަންޓާއި އެމްއެންޑީއެފް އަދި އައްޑޫ އީކުއެޓޯރިއަލް ހޮސްޕިޓަލް ގުޅިގެންނެވެ. މި ޑްރިލްގައި ބައިވެރިވި ހުރިހާ ފަރާތްތަކަށް ވަނީ ސެޓްފިކެޓް ދީފައެވެ.

ހިތަދޫ ރީޖަނަލް ޕޯޓުގައި ގއިމްކުރި ހެލްތު، ސޭފްޓީ އަދި އެންވަޔަރަންމަންޓް ޔުނިޓް ރަސްމީކޮށް އިފްތިތާހްކޮށްދެއްވީ ސީއީއޯ ވަޖީހެވެ. މި ޔުނިޓަކީ ހިތަދޫ ރީޖަނަލް ޕޯޓްގެ ސަލާމަތާއި ރައްކާތެރިކަމުގެ އިތުރަށް ހަރުދަނާކުރުމުގެ ގޮތުން ގާއިމްކުރި ޔުނިޓެކެވެ.