ގިނަ އަދަދެއްގެ މަސްތުވާތަކެއްޗާ އެކު ރާއްޖެ އެތެރެވާން އުޅުނު ދިވެއްސަކު އިންޑިއާގެ ކޮޗިން އެއާޕޯޓުން އަތުލައިގެންފިއެވެ.

އިންޑިއާގެ ބައެއް ނޫސްތަކުން ރިޕޯޓްކޮށްފައިވާ ގޮތުގައި ޔޫސުފް ފުވާދު ނަމަކަށް ކިޔާ އެ މީހާއާމެދު ޝައްކުކުރެވިގެން އޭނާ އިތުރަށް ޗެކްކުރަން މަޑުކުރުވީ އިންޑިއާއިން މާލެ އަންނަން އެއާޕޯޓުގައި ހުއްޓަ އެވެ.

އޭނާގެ ވީޑިއޯއެއް އިންޑިއާގެ ސެންޓްރަލް އިންޑަސްޓްރީ ސެކިއުރިޓީ ފޯސް (ސީއައިއެސްއެފް) އިން އާންމުކޮށްފައިވާ އިރު, އެ ވީޑިއޯއިން ފެންނަނީ އޭނާ ޖަހައިގެން ހުރި ނެޕީ ނައްޓާލުމަށްފަހު ޑުރަގާއެކު އެ ނެޕީ ފުލުހުންނާ ހަވާލުކުރާ މަންޒަރެވެ.

Advertisement

އޭނާގެ އަތުން މަސްތުވާތަކެތީގެ ބާވަތެއް ކަމަށްވާ އެމްފެޓަމައިންގެ 33 ކެޕްސޫލް އަތުލައިގެންފައިވެއެވެ. އޭގެ ބަރުދަނުގައި 325.5 ގްރާމް ހުރި އިރު، އެ ތަކެތީގެ މަގުމަތީގެ އަގުގެ ގޮތުގައި ހަތް ލައްކައަށް ވުރެ ގިން ރުފިޔާއަށް އަރާކަމަށް ސީއައިއެސްއެފް އިން ބުނެއެވެ.

މި މައްސަލާގައި ހައްޔަރުކުރި މީހާ މިހާރު ހުރީ އިންޑިއާގެ ނާކޮޓިކްސް ސެންޓްރަލް ބިއުރޯ (އެންސީބީ)ގެ ބެލުމުގެ ދަށުގަ އެވެ.