ބޮލީވުޑްގެ ތަރި، ސިދާތު މަލްއުތުރާ ފުލުހެއްގެ ރޯލު ކުޅެފައިވާ ވެބް ސީރީޒް "އިންޑިއަން ޕޮލިސް ފޯސް" ގެ ޓީޒާ ޓްރެއިލާ ދައްކާލައިފި އެވެ.

އަންނަ މަހުގެ 19 ގައި އެމެޒޯން ޕްރައިމް ވީޑިއޯ އިން ޕްރީމިއަކުރަން ހަމަޖެހިފައިވާ މި ސީރީޒަކީ ސިދާތުގެ ފުރަތަމަ ސީރީޒް ވެސް މެ އެވެ.

"ސިންގަމް" އާއި "ސިމްބާ" އަދި "ސޫރިއަވަންޝީ" ފަދަ ކާމިޔާބުތައް ފިލްމުތައް ގެނެސްދިން މަޝްހޫރު ޑައިރެކްޓަރު ރޯހިތު ޝެޓީގެ ކޮޕް ޔުނިވާސް އަށް ނިސްބަތްވާ ސީރީޒްގެ ވަރުގަދަ ރޯލުތަކަކުން ޝިލްޕާ ޝެޓީ އާއި ވިވެކް އޮބެރޯއީ ވެސް ފެންނާނެ އެވެ. މީގެ އިތުރު ކާސްޓުންގެ ތެރޭގައި އީޝާ ތަވްލާރް، ނިތިން ދީރް، ޝްވޭތާ ތިވާރީ، ޝަރަދު ކެލްކަރް، މުކޭޝް ރިޝީ އަދި ކަރަންވީރް މަލްއުތުރާ ހިމެނެ އެވެ.

Advertisement

"އިންޑިއަން ޕޮލިސް ފޯސް" އަކީ 7 އެޕިސޯޑްގެ އެއްޗެކެވެ.

މީގެ ޑައިރެކްޓަރު ރޯހިތު މިހާރު އަންނަނީ އަޖޭއާ އެކީ ހަދަމުން އަންނަ "ސިންގަމް" ފްރެންޗައިޒްގެ ތިން ވަނަ ފިލްމު "ސިންގަމް އެގެއިން" ގެ މަސައްކަތް ކުރަމުންނެވެ. އެ ފިލްމު އަންނަ އަހަރުގެ އޮގަސްޓް 14 ގައި ގެނެސްދޭނެ އެވެ.

ރޯހިތުގެ އެންމެ ފަހުގެ ފިލްމަކީ މިދިޔަ އަހަރުގެ ޑިސެމްބަރުގައި ގެނެސްދިން ކޮމެޑީ ފިލްމު "ސާކަސް" އެވެ.