ރައްޔިތުންގެ މަޖިލީހުގެ ހިނގާ ދައުރުގެ މުއްދަތު ތިންވަނަ ފަހަރަށް ދަންމައިލަން މަޖިލީހުގެ ރައީސް މުހައްމަދު އަސްލަމް ހުށަހަޅުއްވައިފިއެވެ.

މަޖިލިހުގެ މިއަދުގެ ޖަލްސާ ފައްޓަވަމުން ރިޔާސަތުގައި އިންނެވި މަޖިލިހުގެ ރައީސް އަސްލަމް ވިދާޅުވީ ރައީސް ޑރ. މުހައްމަދު މުއިއްޒުގެ ސަރުކާރުގައި ހިމެނިވަޑައިގަންނަވާ ވަޒީރުންނަށް ރުހުން ދިނުމާ މެދުގައި ގޮތެއް ނިންމަން ޖެހޭތީ މަޖިލިހުގެ ދައުރު ދަންމާލަން ބޭނުންފުޅުވާ ކަމަށެވެ.

އެހެންވެ، މިއަދުގެ ވޯޓު ގަޑީގައި އެކަމަށް ވޯޓަށް އައްސަވާނެ ކަމަށް ވެސް އަސްލަމް ވިދާޅުވިއެވެ. އަސްލަމްގެ ވާހަކައިގައި މަޖިލިހުގެ ދައުރު ދަންމާލާނީ ކިހާ ދުވަހަކަށް ކަމެއް އަސްލަމް ވިދާޅެއް ނުވެއެވެ.

Advertisement

މަޖިލިހުގެ ދައުރު ދަންމާލަން ނިންމި އިރު، ތިން ވަނަ ދައުރުގެ ޖަލްސާތައް ނިމި، މަޖިލިސް ޗުއްޓީ އަށް ދާން އޮތީ މިއަދެވެ.

މަޖިލިހުގެ ގަވައިދުގައި އޮންނަ ގޮތުން ނަމަ، ޑިސެމްބަރު މަހުން ފެށިގެން މަޖިލިސް އޮންނާނީ ޗުއްޓީގައެވެ. އެކަމަކު، މަޖިލިހުގެ ދައުރު ދަންމާލަން އެންމެ ފުރަތަމަ ނިންމާފައި ވަނީ މިދިޔަ މަހުއެވެ. އެ ފަހަރު ނިންމީ މި މަހުގެ 7 އާ ހަމައަށް ތިން ވަނަ ދައުރު ކުރިއަށް ގެންދިއުމަށެވެ.

އޭގެ ފަހުން މަޖިލިހުގެ ތިން ވަނަ ދައުރު މިއަދުގެ ނިޔަލަށް ކުރިއަށް ގެންދަން ފާސް ކުރީ މި މަހުގެ 6 ގައެވެ.

މަޖިލީހުގެ މި ދައުރުގެ ބޮޑުބައި ދިޔައީ ރައްޔިތުންގެ މަޖިލީހުގެ ރައީސްގެ މަގާމުގައި ކުރިން ހުންނެވި ކުރީގެ ރައީސް މުހައްމަދު ނަޝީދުގެ އިތުބާރު ނެތް މައްސަލައިގައި ކުރިއަށް ނުގެންދެވިއެވެ. އެ މައްސަލަ ތާވަލު ނުކުރުމާއި މަޖިލީހުގައި އޮތް އިހުތިޖާޖުތަކާ ހެދި މަޖިލީހުގައި އިތުރު އެއްވެސް މަސައްކަތެއް ކުރިޔަށް ނުގެންދެވުނެވެ.