ބިޒްނަސް ސެންޓަރު ކޯޕަރޭޝަން (ބީސީސީ) ގެ މެނޭޖިން ޑިރެކްޓަރުގެ މަގާމަށް ނައިބު ރައީސް ހުސައިން މުހައްމަދު ލަތީފްގެ ކޮއްކޯފުޅު އަދި މަޝްހޫރު ޕްރެޒެންޓަރު އިބްރާހިމް ޒިޔާއު މުހައްމަދު ހަމަޖައްސައިފިއެވެ.

ޓީވީއެމްގެ އެކި ޕްރޮގްރާމްތައް ހުށަހަޅައި ދިނުމުގައި މަޝްހޫރު ކަން ހޯދި ޒިޔާއު މިހާތަނަށް ހުންނެވީ ސަރުކާރުގެ 100 އިންސައްތަ ހިއްސާ އޮންނަ ބީސީސީގެ ހެޑް އޮފް އައުޓް ރީޗްގެ މަގާމުގައެވެ.

ސަރުކާރުގެ ވަރަށް ގިނަ ކުންފުނިތަކަށް މިހާރު ވަނީ މެނޭޖިން ޑިރެކްޓަރުން އައްޔަންކޮށްފައެވެ. އެގޮތުން މިއަދު ވަނީ އެމްއެމްޕީއާރުސީގެ މެނޭޖިން ޑިރެކްޓަރުގެ މަގާމަށް ވެސް ބޭފުޅަކު ހަމަޖައްސައިފައެވެ.

Advertisement

ގދ. ފަރެސްމާތޮޑާއަށް އުފަން ޒިޔާއަކީ ކުޑައިރުން ފެށިގެން މާލޭގައި ދިރިއުޅެމުން އަންނަ ޒުވާނެކެވެ. ރަށުންނާއި ގދ. ތިނަދޫން ވެސް ތައުލީމް ހާސިލް ކުރެއްވިއެވެ. އެކަމަކު ދިރިއުޅުމުގެ ބޮޑުބައި ހޭދަ ކުރެއްވީ މާލޭ ގައެވެ. އޭނާ ގްރޭޑް 10 ނިންމަވާލެއްވީ ގދ. އެޓޯލް އެޑިއުކޭޝަން ސެންޓަރުގައެވެ.

ޒިޔާއަކީ ފުރަތަމަ ސިއްހީ ދާއިރާއިން ވަޒީފާއަށް ނުކުތް ބޭފުޅެކެވެ. ޕްރައިމަރީ ހެލްތް ކެއާ ކިޔެވުމަށްފަހު ފަރެސްމާތޮޑާ ސިއްހީ މަރުކަޒު ހިންގުމާއި ހަވާލުވީ އޭރު ޒިޔާގެ އުމުރުން 18 އަހަރެވެ.