ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ގެ ޕާލިމެންޓްރީ ގްރޫޕުގެ ކުރީގެ ލީޑަރ އަދި ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމަށް އެ ޕާޓީގެ އެއްވެސް މަގާމަކަށް ދެން ކުރިމަތިލެވޭނީ 5 އަހަރު ފަހުން އެމްޑީޕީގެ ފިޔަވަޅުއަޅާ ކޮމެޓީން އިއްޔެ ނިންމައިފިއެވެ.

އާޒިމްގެ މައްސަލަ ބެލުމަށްފަހު އެ ޕާޓީގެ ފިޔަވަޅު އަޅާ ކޮމިޓީން ނިންމާފައިވާ ނިންމުންތަކަށް ބަލާއިރު، އަލީ އާޒިމަށް އެމްޑީޕީއަށް އަލުން ވަދެވޭނީ އެޕާޓީއަށް ވަންނަން އެދޭ 100 މީހުންގެ ސައްހަ ފޯމާއެކު ޕާޓީއަށް ވަންނަން އެދޭ ފޯމު ހުށަހެޅުމުންނެވެ. އެއް އަހަރަށް ފަހު އާޒިމަށް އަލުން އެމްޑީޕީއަށް ވަދެވުނު ނަމަވެސް ކުރިއަށް އޮތް ފަސް އަހަރު ދުވަހަށް އެމްޑީޕީގެ އެތެރޭގެ އެއްވެސް އިންތިހާބެއްގައި އޭނާއަށް ވާދައެއް ނުކުރެވޭނެއެވެ.

މީގެ އިތުރުން އެ ޕާޓީގެ އެއްވެސް ޕްރައިމަރީއެއްގައި ވެސް ބައިވެރިއެއް ނުވެވޭނެއެވެ.

Advertisement

އަލީ އާޒިމް އެމްޑީޕީން ވަކިކޮށްފައިވަނީ ޗާގޯސް މައްސަލާގައި އިދިކޮޅު ފަރާތްތަކުން ކުރިއަށް ގެންދާ އިތުބާރު ނެތް ކަމުގެ ވޯޓުތަކުގެ ތެރެއިން އެޓާނީ ޖެނެރަލް އިބްރާހިމް ރިފްއަތުގެ މައްސަލާގައި ސޮއި ކޮށް، ޗާގޯސް މައްސަލާގައި ސަރުކާރާ ދެކޮޅަށް އުފައްދާފައިވާ އިއްތިހާދުން ބޭއްވި ނޫސްވެރިންގެ ބައްދަލުވުމެއްގައި ބައިވެރިވުމުންނެވެ.