ހުރަވީ ދުވަސް ކުލަގަދަކޮށް ރާއްޖޭގައި ފާހަގަކުރުމަށް ސަރުކާރުން ހިންގަވާ ހަރާކާތްތަކުގެ ތެރޭގައި ހިމެނޭ "ދޮންބަންޑާރައިންގެ ހަނދާނީ މައުރަޒު" ހުޅުވިފައި ހުންނަ މުއްދަތު އިތުރުކޮށްފިއެވެ.

މިއަހަރުގެ ހުރަވީ ދުވަހުގެ މުނާސަބަތުގައި މިނިސްޓްރީ އޮފް ދިވެހި ލެންގުއޭޖް، ކަލްޗަރ އެންޑް ހެރިޓޭޖް އާއި ސަގާފީ ތަރިކަ ރައްކާތެރި ކުރާ ގައުމީ މަރުކަޒު ގުޅިގެން "ދޮންބަންޑާރައިންގެ ހަނދާނީ މައުރަޒު" ހުޅުވީ މި މަހުގެ 17 ގައެވެ. ކުރިން އޮތް ގޮތުން އިއްޔެއަކީ މި މައުރަޒު ހުޅުވޭނެ އެންމެ ފަހު ދުވަހެވެ.

މިނިސްޓްރީން ބުނީ އާންމުންގެ ފަރާތުން ލިބެމުން އަންނަ ތަރުހީބު އިތުރުވުމުގެ ސަބަބުން މައުރަޒު ހުޅުވިފައި ހުންނަ މުއްދަތު ޑިސެންބަރު 24 އަށް އިތުރުކުރެވިފައިވާ ކަމަށެވެ.

Advertisement

މި މައުރަޒު ހުޅުވިފައި ހުންނާނީ ހުކުރު ދުވަސް ފިޔަވައި ކޮންމެ ދުވަހަކު 10:00 އިން 22:00 އަށް ގައުމީ ދާރުލްއާސާރުގައެވެ.

މި މައުރަޒުގައި ބަހައްޓާފައިވާ ތަކެތީގެ ތެރޭގައި ދޮންބަންޑާރައިންނަށް ނިސްބަތްވާ ބައެއް އާސާރުތަކާއި، އިހުގައި ބޭނުންކޮށްފައިވާ ބައެއް ހަތިޔާރުތަކާއި ދޮންބަންޑާރައިންނަށް ނިސްބަތްވާ ބައެއް އާސާރުތަކުގެ ތެރޭގައި ތުރުކުރެއްވި ފަގުޑިކޮޅާއި، ބޭނުންކުރެއްވި ލޮންސިކޮޅާއި، ދޮންބަންޑާރައިންގެ ރަސްކަމުގައި ޖެއްސެވި ފައިސާފޮތިކޮޅުތައް ހިމެނެއެވެ.

މީގެ އިތުރުން މަލާބާރީން މާލެއަރައި ހިންގި ކަންކަމާ ބެހޭ ޚުލާސާ މައުލޫމާތުތައް ހިމެނޭ ލޯ ފަތްކޮޅެއް ވެސް ވެއެވެ.