ރަސްމާލެ ހިއްކުމުގެ މަޝްރޫއު ފެއްޓެވީ ހުޅުމާލެ، ގުޅީފަޅު، ގިރާވަރުފަޅު ހިއްކައިގެން ބޯހިޔާވަހިކަމުގެ މައްސަލަ ހައްލުވާން ނެތީމަ ކަމުގައި ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެއެވެ.

މަސީން ހޮޓެލް ޖެންގައި ބޭއްވި ބިލްޑާސް އެވޯޑް ދިނުމުގެ ހަފްލާގައި ވާހަކަފުޅު ދައްކަވަމުން ރައީސް ވިދާޅުވީ މާލޭގައި އެންމެ ބޮޑު އަދި ރާއްޖޭގައި ވެސް އެންމެ ބޮޑު އެއް މައްސަލަ ކަމުގައިވާ ގެދޮރުގެ މައްސަލަ ހައްލު ކުރުމަށްޓަކައި މިހާރު ހިއްކާފައިވާ އަދި ހިއްކަމުންދާ ސަރަހައްދުތަކުން ނުފުދޭނެ ކަމަށެވެ.

އެމަނިކުފާނު ވިދާޅުވި ގޮތުގައި އެ ހުރިހާ ބިމަކުން ހާސިލުވެގެން ދަނީ މާލޭގައި ގެދޮރުގެ މައްސަލައަށް ހައްލު ލިބުމެވެ. އަދި ޖުމްލަކޮށް ރާއްޖޭގައި ގެދޮރުގެ މައްސަލަ އާއި، މި ސަރަހައްދުން ގެދޮރު ބޭނުންވާ އެންމެންނަށް އެ ހައްލު ލިބިގެންދިޔުން ކަމަށް ވިދާޅުވިއެވެ.

ސަރުކާރުގެ ސިޔާސަތަކީ ސަރަހައްދީ ތަރައްގީގެ ސިޔާސަތު ކަމަށާއި އުތުރާއި ދެކުނަށް، މެދު ރާއްޖެތެރެ އާއި އެކި ސަރަޙައްދުތަކުގައި އާބަން ސެންޓަރުތައް ގާއިމުކުރުން ކަމަށް ވިދާޅުވިއެވެ.

ހަމައެކަނި މާލެ ކައިރި ތަރައްގީކޮށްގެން، މާލެ ކައިރި ތޮއްޖެއްސުމަކީ މި ސަރުކާރުގެ ސިޔާސަތެއް ނޫން ކަމަށާއި އެހެން ނަމަވެސް، ސަރަހައްދުން ގެދޮރު ބޭނުންވާ އެންމެންނަށް ބޭނުންވާ ބިން، ދައުރުގެ ފަހުކޮޅު ވޯޓުކޮޅެއް ހޯދަންވީމާ، އެ ވޯޓުގެ ދަހިވެތިކަމުގައި ހިއްކާ ބިމަކަށް ނަހައްދަވާނެ ކަމަށް ވިދާޅުވިއެވެ.

ރަސްމާލެ ތަރައްގީކުރުމަށް ފުށިދިއްގަރު ފަޅު ހިއްކުމަށް ފެށި މަޝްރޫޢަށް ހަފުތާއެއްވީއިރު 10 ހެކްޓަރުގެ ބިން ހިއްކައި ނިންމާފައިވެއެވެ. ދައުލަތުން އެއްވެސް ފައިސާއެއް ހަރަދުނުވާ ގޮތަށް ހުޅުމާލެއިން 10 ހެކްޓަރުގެ ބިމާއި ފުށިދިއްގަރުފަޅުގެ ހިއްކާ ބައިން 60 ހެކްޓަރުގެ ބިން ސީއެމްސީސީއަށް ލިބޭ ގޮތަށް ހިންގާ މި މަޝްރޫއުގެ ބިން ހިއްކުމުގެ މަސައްކަތް ފެށީ މި މަހުގެ 18 ވަނަ ދުވަހުއެވެ.