ތިރީސް މީހުން ދަތުރުކުރި ލޯންޗެއް އަޑިއަށް ހިނގައްޖެ އެވެ.

އެމްއެންޑީއެފުން ބުނި ގޮތުގައި 30 މީހުންނާއެކު ދަތުރުކުރަމުން ދިޔަ "ލީޖަން 7" ނަމަކަށް ކިޔާ ލޯންޗަށް ރާޅެއް އަރައި، ދިޔަވެ މިހާރު ވަނީ އަޑިއަށް ގޮސްފައެވެ. އެ ލޯންޗަކީ މާލެއިން ފުރައިގެން ނ. ވެލިދޫއަށް ދަތުރު ކުރަމުން ދިޔަ ލޯންޗެކެވެ. ލޯންޗަށް ރާޅު އަރާފައިވަނީ ނ. ރަންދެލި ރިސޯޓު ކައިރިންނެވެ. އެހެން ކަމުން ލޯންޗު ވަނީ އެވަގުތު ރަންދެލި ރިސޯޓުގެ ފަޅަށް ވަދެފައެވެ. އަދި ލޯންޗުގައި ތިބި މީހުން ރަންދެލި ރިސޯޓަށް ފޭބި ފަހުން ރިސޯޓުގެ ފަޅުތެރެއަށް ލޯންޗު ވަނީ އަޑިއަށް ގޮސްފައެެވެ. މި ހާދިސާގެ މައުލޫމާތު ލިބުމާއެކު އެމްއެންޑީއެފް ނޮދަން އޭރިއާ ކޯސްޓްގާޑް ފަސްޓް ސްކޮޑްރަންގެ ހާބާ ކްރާފްޓް، ޑައިވަރުން ނާއެކު ވަނީ އެ ސަރަހައްދަށް ގޮސް ހަރަކާތްތެރިވާން ފަށައިފައިވާ ކަމަށް އެމްއެންޑީއެފުން ބުންޏެވެ. ރަންދެލި ރިސޯޓުގެ ޑައިވަރުންނާއި ރިސޯޓުގައި އޮތް "ރީފްލައިން" ނަމަކަށް ކިޔާ ދޯންޏެއްގެ ފަޅުވެރިންނާއެކު ކޯސްޓްގާޑުގެ ޑައިވަރުން މިހާރު ދަނީ ލޯންޗު ފެނުން މައްޗަށް ނެގުމުގެ މަސައްކަތް ކުރަމުންނެވެ