މާލެ ރައްޔިތުންނަށް ގޯތި ދިނުމަށް ހިންގާ "ބިންވެރިޔާ" ސްކީމްގެ ދަށުން ގޯތި ލިބޭ މީހުންގެ ލިސްޓު މިއަދު ނެރުމަށް ވަނީ ހަމަޖެހިފައެވެ.

މިކަމަށް ބާއްވާ ޕްރެސް ކޮންފަރެންސް އޮންނާނީ ހަވީރު 4 ޖަހާއިރު ރައީސް އޮފީހުގަ އެވެ.

ހައުސިން މިނިސްޓްރީގެ ސްޓޭޓް މިނިސްޓަރު އަކުރަމް ކަމާލުއްދީން ކުރެއްވި ޓްވީޓެއްގައި ވިދާޅުވީ ޕްރެސް ކޮންފަރެންސަށް ފަހު، ގޯތީގެ ލިސްޓު ގެޒެޓްކުރާނެ ކަމަށެވެ.

Advertisement

ކުރިން ބުނެފައިވާ ގޮތުގައި ލިސްޓުތައް އާންމުކުރުމަށް ފަހު، ކުރިން ވެސް އޮންނަ ގޮތަށް ޝަކުވާ ހުށަހެޅުމަށް މުއްދަތެއް ދޭނެ އެވެ. ދާއިމީ ލިސްޓު ކަނޑައަޅާނީ އޭގެ ފަހުންނެވެ.

ސަރުކާރުގެ ގެދޮރުވެރިޔާ އަދި ބިންވެރިޔާ ޕްރޮގްރާމަށް ހުޅުވާލުމުން 35،800 މީހުން ކުރިމަތިލި އެވެ. އޭގެ ތެރޭގައި ހިމެނެނީ ފްލެޓަށް ކުރިމަތިލި 20،600 މީހުންނާއި ގޯއްޗަށް ކުރިމަތިލި 15،200 މީހުންނެވެ. ފްލެޓަށް ކުރިމަތިލީ މީހުންގެ ތެރެއިން 14،400 މީހުން ކުރިމަތިލީ ތިން ކޮޓަރީގެ އެޕާޓްމެންޓަށެވެ. އަދި 6،200 މީހުން ކުރިމަތިލީ ދެ ކޮޓަރީގެ އެޕާޓްމެންޓަށެވެ.

ފްލެޓަށް ކުރިމަތިލި މީހުންގެ ލިސްޓު މިއަދު ނެރޭ ގޮތަކަށް ހަމަޖެހިފައެއް ނުވެ އެވެ.

ސަރުކާރުގެ ބޯހިޔާވަހިކަމުގެ މަޝްރޫއުގައި އަންނަނީ 32 ޓަވަރުގައި 4،000 ފްލެޓު އަޅަމުންނެވެ. މި އަހަރު ނިމުމުގެ ކުރިން އެތަނުން އަށް ޓަވަރެއްގެ މަސައްކަތް ނިންމަން ވަނީ އަމާޒު ހިފައިފަ އެވެ.

މި މަޝްރޫއުގައި ހިމެނެނީ 17 އަދި 18 ބުރީގެ ޓަވަރުތަކެވެ. ކޮންމެ ފްލޯއެއްގައި އަށް އެޕާޓްމެންޓް ހުންނާނެ އެވެ. އޭގެ ތެރޭގައި ހިމެނެނީ ދެ ކޮޓަރީގެ 1،200 އެޕާޓްމެންޓާއި ތިން ކޮޓަރީގެ 2،800 އެޕާޓްމެންޓެވެ.