ހައްޖު ކޯޕަރޭޝަނަށް ގެންނަ ބަދަލުތަކާއެކު، ކުރިއަށް އޮތް ތަނުގައި މިހާރަށްވުރެ ހެޔޮ އަގުގައި ރާއްޖެއިން ހައްޖަށް ދެވޭނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

އަމިއްލަ ގުރޫޕުތަކުން މީހުން ހައްޖަށް ގެންދަމުންދަނީ މާ އަގު ބޮޑުކޮށް ކަމަށާއި، އޭގެ ސަބަބުން އެތައް ރައްޔިތުންނަކަށް ނޭދެވޭ އަސަރު ކުރާނީ އެކަމަށް ހައްލު ހޯދުމަށް މަސައްކަތް ކުރައްވާނެ ކަމަށް މިނިސްޓަރު ޝަހީމު މީގެ ކުރިންވެސް ވަނީ ވިދާޅުވެފަ އެވެ.

އެގޮތުން، ރާއްޖެއަށް ލިބޭ ރަސްމީ ހައްޖު ކޯޓާތައް ހައްޖު ކޯޕަރޭޝަނަށް ދޭން ނިންމައި އެކަމާ ގުޅޭ އެއްބަސްވުމުގައި މިނިސްޓްރީން އިއްޔެ ވަނީ ސޮއިކޮށްފަ އެވެ.

Advertisement

އެ އެއްބަސްވުމުގައި ސޮއިކުރެއްވުމަށް އިއްޔެ ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރު ޝަހީމު ވިދާޅުވީ ރާއްޖެއަށް ދީފައިވާ ހައްޖު ކޯޓާތަކުގައި މިހާރަށްވުރެއް ހެޔޮ އަގުގައި ހައްޖަށް ދެވޭނެ މަގު ފަހިކޮށްދިނުމަށް މަސައްކަތް ކުރަމުން އަންނަ ކަމަށެވެ.

".. [ހައްޖު ކޯޓާތައް ހައްޖު ކޯޕަރޭޝަނަށް ދޭން] މިނިންމީ ގިނަ ވިސްނުންތަކަކަށްފަހު، މީގެ ކުރިން ބައެއް ޖަމާއަތްތަކުން ފައިސާ ނަގައިގެން، ހައްޖަށް މީހުންނަށް ނުދެވި އެބަހުރި، އަދި ބޮޑު އަގުގައި ހައްޖު ކޯޓާ ގަނެފައި ވިއްކާފައި އެބަހުރި، އެކަންތައްތަކަށް ވިސްނާފައި މިގޮތަށް މިނިންމީ،" މިނިސްޓަރު ވިދާޅުވި އެވެ.

އެގޮތުން ހައްޖު ކޯޕަރޭޝަނަށް ގެންނަން ބަދަލުތަކާއެކު، ހައްޖަށް ދިއުމަށް ދައްކާ ފައިސާ މިހާރަށްވުރެ ކުޑަ ކުރެވޭނެ ކަމަށް މިނިސްޓަރު ޝަހީމު ވިދާޅުވި އެވެ.

"މި ދައްކަން ޖެހޭ ފައިސާ ކުޑަކުރެވޭނެ ގޮތްތަކާއި ގުޅޭގޮތުން މަޝްވަރާކުރެވެމުންދަނީ، އެކި ދާއިރާތަކުން އިންވެސްޓުކޮށް، ޙައްޖު ކޯޕަރޭޝަނަށް ލިބޭ އާމްދަނީ އިތުރުކޮށްގެން ނަމަވެސް، ޙައްޖަށްގެންދަން ނަގާ ފައިސާ ކުޑަކުރެވޭނެ ގޮތްތައް ހޯދަމުން މިދަނީ،" ޝަހީމް ވިދާޅުވި އެވެ.