އަންނަ އަހަރު ރާއްޖެއިން ޙައްޖަށްދިއުމުގެ ފުރުޞަތު ލިބިފައިވާ މީހުންނަށް ޙައްޖުގެ ދައުވަތު ފޮނުވައިފިއެވެ. ޙައްޖަށް ދިއުމުގެ ފުރުޞަތު ލިބުނު ކަމުގެ ދަޢުވަތު ފޮނުވާފައިވަނީ އެ ކޯޕަރޭޝަންގެ ކިއު ތަރުތީބުންނެވެ.

ޙައްޖުކޯޕަރޭޝަންގެ ސީނިއަރ މެނޭޖާރ، ކޯޕަރޭޓް އެފެއާރޒް އާއިޝަތު ޤާހިރު ވިދާޅުވީ 1445 ވަނަ އަހަރު ރާއްޖެއިން ޙައްޖަށް ދިއުމުގެ ފުރުސަތު ލިބޭ މީހުންނަށް އެ ފުރުޞަތު ލިބިފައިވާކަމަށް އަންގާފައިވަކަމަށެވެ.

އައިޝަތު ވިދާޅުވީ އަންނަ އަހަރު ޙައްޖަށްދާ މީހުންގެ އިންތިޒާމްތައް ހަމަޖެއްސުމުގެ މަސައްކަތްތައްވެސް ކުރަމުން އަންނަކަމަށެވެ. އެގޮތުން ދަތުރަށް ފުރުމުގެ ކުރިން ވެކްސިން ޖެހުމާއި މެޑިކަލް ޗެކްއަޕް ހެދުމަށް އަންގަމުން ދާނެކަމަށް އޭނާ ވިދާޅުވިއެވެ. އަދި ޙައްޖަށް ދާ މީހުން ގެއްލުނުނަމަވެސް ފަސޭހައިން ހޯދުމަށްޓަަކައި ކޮންމެ މީހަކަށް ޓްރެކިން ޑިވައިސް ފޯރުކޮށްދިނުމަށްޓަކައި އެ ތަކެތި ހޯދުމުގެ މަސައްކަތްވެސް ކުރަމުން އަންނަކަމަށް އޭނާ ވިދާޅުވިއެވެ.

Advertisement

ޙައްޖު ކޯޕާރޭޝަންގެ ހަވާލުގައި ޙައްޖަށް ދިއުމުގެ ފުރުޞަތު ދެނީ ކިއު ތަރުތީބުންނެވެ. ޙައްޖަށް ދިޔުމަށް މިވަގުތު ޙައްޖު ކޯޕަރޭޝަނުގެ ކިޔުގައި 6018 މީހުން ރަޖިސްޓްރީވެފައި އެބަތިއްބެވެ. މީގެތެރެއިން 4706 މީހުން ވަނީ ޙައްޖަށް ދިއުމަށް ދައްކަން ޖެހޭ ފައިސާ އެއްކޮށް ދައްކާފައެވެ.

ކޮންމެ އަހަރެއްގައިވެސް ސައުދީޢަރަބިއްޔާއިން ރާއްޖެއަށް 1000 ކޯޓާ ދޫކުރެއެވެ. އެ ކޯޓާގައި މީގެ ކުރިން ޙައްޖު ކޯޕަރޭޝަންއާއެކު އަމިއްލަ ޖަމާއަތްތަކަށްވެސް ޙައްޖަށް މީހުން ގެންދިޔުމުގެ ފުރުޞަތުދެއެވެ. އެހެންނަމަވެސް ސަރުކާރުން މިހާރު ނިންމަވާފައިވަނީ 1000 ކޯޓާގައި ހައްޖަށް މީހުން ގެންދާނީ ހަމައެކަނީ ޙައްޖު ކޯޕަރޭޝަނުން އެކަނިކަމަށެވެ. މީގެ އިތުރުން ސަރުކާރުން ނިންމަވާފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ވަޢުދުފުޅާ އެއްގޮތަށް 50 ފަޤީރުން ހައްޖަށް ފޮނުވުމަށްވެސް ނިންމަވާފައެވެ.