މާވެޔޮ މިސްކިތް ކައިރީ މަގުމައްޗަށް ވާގޮތަށް ހުރި ސްޓެލްކޯގެ ޓްރާންސްފޯމަރު އެތަނުން ނަގައިފިއެވެ.

މި ޓްރާންސްފޯމަރު އެތަނުން ނަގާފައިވަނީ އެ ސަރަޙައްދުގެ މަގުމަތި ބޭނުންކުރާ ފަރާތްތަކުގެ ރައްކާތެރިކަމާއި ފަސޭހައަށްކަމަށް އެކުންފުނިން ބުނެއެވެ.

މި ޓްރާންސްފޯމަރު ނެގުމުގެ މަސައްކަތް ސްޓެލްކޯއިން ފަށާފައިވަނީ މިދިޔަ ނޮވެމްބަރު މަހުގެ ފަހުކޮޅުގައެވެ. މިއީ އެކުންފުނީގެ އައު މެނޭޖިންގ ޑިރެކްޓަރ ޙުސައިން ފަހުމީ، މިދިޔަ ނޮވެމްބަރުމަހުގެ 28 ވަނަ ދުވަހު މަޤާމާ ޙަވާލުވެވަޑައިގެން އެންމެ ފުރަތަމަ ފެށްޓެވި މަސައްކަތެވެ.

Advertisement

މަޤާމާ ޙަވާލުވެވަޑައިގެން ފުރަތަމަ ދުވަހު ފަހުމީ ވަނީ އެ ސަރަޙައްދަށްގޮސް، މާވެޔޮ މިސްކިތް ހުންނަ ސަރަހައްދުގައި ރައްޔިތުންނަށް އުނދަގޫވާގޮތަށް މަގުމަތީގައި ބަހައްޓާފައިވާ ޓްރާންސްފޯމަރު މި އަހަރު ނިމުމުގެ ކުރިން ނަގާނެކަމުގެ ޔަޤީންކަންދެއްވާފައެވެ. ޓްރާންސްފޯމަރު ނެގުމުގެ މަސައްކަތް ސްޓެލްކޯއިން ފުރިހަމަކޮށްފައި މިވަނީ ގާތްގަނޑަކަށް މަސް ދުވަހުގެ މަސައްކަތުންނެވެ.