އެމްޑީޕީ އަކީ އަދިވެސް އެންމެ ވަރުގަދަ ޕާޓީ ކަމަށް ރައްޔިތުންގެ މަޖިލީހުގެ ނައިބު ރައީސް އަދި ހޯރަފުށީ ދާއިރާގެ މެމްބަރު އަހުމަދު ސަލީމް ވިދާޅުވެއްޖެ އެވެ.

އެމްޑީޕީ ޕާލިމެންޓްރީ ގްރޫޕުން މިއަދު ބޭއްވި ނޫސްވެރިންގެ ބައްދަލުވުމުގައި ސަލީމް ވިދާޅުވީ އެމްޑީޕީ ޕާލިމެންޓަރީ ގްރޫޕް އޮތީ ވަރަށް ވަރުގަދަކޮށް ކަމަށާއި 43 މެންބަރުން ތިބި އެހެން އެއްވެސް ޕާޓީއެއް ރައްޔިތުންގެ މަޖިލީހުގައި ނެތް ކަމަށެވެ. އަދި 19 ވަނަ ރައްޔިތުންގެ މަޖިލިސް ވެސް ނިންމާނީ އެމްޑީޕީގެ ޕާލިމެންޓަރީ ގްރޫޕް ވަރުގަދަކޮށް އޮވެގެން ކަމަށާއި "ފެއިލް" ވި ބަޔަކު ވަރުގަދަކޮށް ނޯންނާނެ ކަމަށް ސަލީމް ވިދާޅުވި އެވެ.

"ފެއިލްވި ބަޔަކު ވަރުގަދަކޮށް ނޯންނާނެ ދެއްތޯ. އަޅުގަނޑުމެންނަކީ އެންމެ ވަރުގަދަ ޕާޓީ ހަމަ،" ސަލީމް ވިދާޅުވި އެވެ.

Advertisement

ސަލީމް މިހެން ވިދާޅުވެފައިމިވަނީ ރައްޔިތުންގެ މަޖިލީހުގައި އެމްޑީޕީ ތަމްސީލުކުރައްވަމުން ގެންދެވި 13 މެމްބަރަކު އެ ޕާޓީ ދޫކޮށް ޕީއެންސީ އަށް ބަދަލުވެފައިވާ ދަނޑިވަޅެއްގަ އެވެ.

ޕީއެންސީ އަށް މެމްބަރުން ގެންދިޔުމުގައި ފައިސާ ހަރަދުކުރި ކަމަށް އެމްޑީޕީގެ ޕީޖީ ގްރޫޕްގެ ބައެއް މެމްބަރުން ވަނީ ތުހުމަތުކޮށްފަ އެވެ. ނަމަވެސް އެ ތުހުމަތުތައް ސަރުކާރުން ވަނީ ދޮގުކޮށްފަ އެވެ.

ގިނަ އަދަދެއްގެ މެމްބަރުންތަކެއް ޕާޓީން ވަކިވުމުން އެމްޑީޕީގެ ޕާލަމެންޓްރީ ގްރޫޕްގެ މެމްބަރުން އަދަދު މިހާރު ވަނީ 55 އިން 42 އަށް ދަށްވެފަ އެވެ.