އައު އަހަރުގެ ފެށުން ފާހަގަކުރުމަށް، "ދިވެހީންގެ ރާއްޖެ ފެސްޓިވަލް"ގެ ނަމުގައި ކުޑަކުދިންގެ ހަވީރެއް ހުޅުމާލޭ ސެންޓުރަލް ޕާކުގައި މިއަދު އޮންނާނެއެވެ.

މިނިސްޓްރީ އޮފް ޔޫތު އެމްޕަވާމެންޓު، އިންފޮމޭޝަން އެންޑް އާޓުން އިންތިޒާމުކުރާ މިފެސްޓިވަލްގެ ހަރަކާތްތަކުގެ ތެރެއިން މިއަދު ހަވީރު ބާއްވާ ކުޑަކުދިންގެ ހަވީރުގައި ގިނަ ހަރަކާތްތަކެއް ކުރިއަށްގެންދަންވަނީ ރާވާފައެވެ.

އެގޮތުން ކުޑަކުދިންގެ މެދުގައި މަޤުބޫލުކަން ހޯދާފައިވާ ރޮބޯމޭންގެ ހަރަކާތްތައް މި ހަވީރުގައި ފެނިގެންދާނެއެވެ. އަދި ޖާދޫގެ ޝޯއަކާއި، ސްނޯ އޭރިއާއެއްގެ އިތުރަށް ބޮޑުބެރުގެ ހަރަކާތްތައްވެސް މި ހަވީރުގެ ތެރެއިން ފެންނާނެއެވެ.

Advertisement

މިއަދު ބާއްވާ ކުޑަކުދިންގެ ހަވީރުގައި ކާބޯތަކެތި ވިއްކާ ސްޓޯލުތަކާއި ބައުންސީ ކެސަލްވެސް ބަހައްޓާފައި ހުންނާނެއެވެ. މި ހަވީރު އޮންނާނީ މިއަދު މެންދުރުފަހު 16:00 އިން އިރުއޮއްސި 18:00 އާ ހަމައަށެވެ.

"ދިވެހީންގެ ރާއްޖެ ފެސްޓިވަލް"ގެ ތެރޭގައި ގިނަ ހަރަކާތްތަކެއް ހިންގަން ރޭވި ނަމަވެސް މޫސުން ގޯސްވެ ބޯކޮށް ވިއްސާރަކުރުމުގެ ސަބަބުން ރޭގަނޑު ބޭއްވުމަށް ނިންމާފައިވާ ލޭޒާ ޝޯއާއި ހަވާ އެރުވުމާއި، މިއުޒިކު ޝޯ ފަސްކުރުމަށް ޔޫތު މިނިސްޓްރީން ނިންމާފައިވެއެވެ.