މާލެއަށް ފާއިތުވި ދުވަސްތަކު ވެހުނު ބޯ ވިއްސާރައިގެ ސަބަބުން ހުޅުމާލެ ސަހަރާގެ ބިންގަނޑުގައި ފެންހެދި، އަދިވެސް ނުހިނދޭތީ ހުޅުމާލެ ސަހަރާގައި މައްޔިތުން ވަޅުލުން މެދުކަނޑާލައިފިއެވެ.

ހުޅުމާލެ ސަހަރާގައި ވަޅުލާން ހަމަޖެހިފައިވާ މައްޔިތުން ވަގުތީގޮތުން މާލެ އާސަހަރާއަށް ބަދުކުރަން ނިންމާފައިވެއެވެ.

ސިޓީ ކައުންސިލްގެ މީޑިއާ އޮފިޝަލް މައުލޫމާތު ދިން ގޮތުން، މަރުވެފައިވާ މީހުން ވަޅުލުމަށް ކޮންނައިރު ހުޅުމާލެ ސަހަރާގެ ބިންގަނޑުން ފެންއަރަންފަށާކަމަށެވެ. އެހެންކަމުން ހުޅުމާލެ ސަހަރާގައި މީހުން ވަޅުލެވޭގޮތް ވެފައިނުވާކަމަށް މީޑިއާ އޮފިޝަލް ވިދާޅުވިއެވެ.

Advertisement

އެގޮތުން، ހުޅުމާލެ ސަހަރާއިން ފެން ހިނދެން އަދި ގާތްގަނޑަކަށް ހަފްތާއެއް ނަގާނެއެވެ. އެހެންކަމުން ވިލިމާލެ އަދި ހުޅުމާލެގައި މަރުވާ މީހުން ވަގުތީގޮތުން ވަޅުލާން ހަމަޖެހިފައިވަނީ، އާސަހަރާގައިކަމަށް މީޑިއާ އޮފިޝަލް ވިދާޅުވެފައިވެއެވެ. ނަމަވެސް ހުޅުމާލޭގައި މަރުވާ މީހުންގެ މޫނުދެއްކުން ކުރިޔަށްދާނީ ހުޅުމާލޭގައެވެ.