މި އަހަރުގެ ފުރަތަމަ ކުއާޓާގައި ފުލުހުންނާއި ސިފައިންގެ މުސާރަ ބޮޑު ކުރައްވާނެކަމަށް ފިނޭންސް މިނިސްޓަރު ޑރ. މުހައްމަދު ޝަފީގު ވިދާޅުވެއްޖެއެވެ.

ފިނޭންސް މިނިސްޓަރ ވިދާޅުވީ، މިހާރު ކުރެވެމުންދާ މަސައްކަތަކީ މިކަމަށް ބޭނުންވާ ސްޓްރަކްޗަރ އެކުލަވާލުމުގެ މަސައްކަތްކަމަށެވެ. އަދި ދާދިއަވަހަށް ސްޓްރަކްޗަރ އެކުލެވޭނެ ކަމަށާއި އެއާއެކު މުސާރައަށް އަންނަ ބަދަލު އެނގިގެންދާނެކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ، މީގެ އެންމެ މުހިންމު އެއް ބޭނުމަކީ ޕޭ ހާމަނައިޒްކުރުންކަމަށެވެ. އެއް މުއައްސަސާއާއި އަނެއް މުއައްސަސާގެ މުސާރައިގެ ފަރަގު ކުޑަކުރުންކަމަށެވެ. އަދި މުސާރައިގެ ފަރަގު ކުޑަކޮށް ކޮންމެ އިދާރާއަކަށްވެސް ރަނގަޅު މުވައްޒަފުން ހޯދައި ރަނގަޅު މުވައްޒަފުން ހިފެހެއްޓުންކަމަށެވެ.

Advertisement

ސިފައިންނާއި ފުލުހުންގެ މުސާރަ ބޮޑުކުރުމަށް ރައީސް ވަޢުދުވެވަޑައިގެންނެވީ ރިޔާސީ އިންތިޚާބުގެ ކެމްޕެއިގެ ތެރޭގައެވެ.މިއަހަރުގެ ބަޖެޓްގައި ޕޭ ހާމަނައިޒްކުރުމަށް ކަނޑައަޅާފައިވަނީ 500 މިލިއަން ރުފިޔާ ކަމަށް މިނިސްޓަރ ފާހަގަކުރެއްވިއެވެ. އެހެންކަމުން ޕޭ ހާމަނައިޒް ކުރަނީ ފަހަރަކު އިދާރާއެއް ކަމަށް މިނިސްޓަރ ވިދާޅުވިއެވެ.