އެތެރޭގެ އުދުހުންތަކުގެ އަގުތައް މިހާރު ބޮޑު ކަމަށާއި އެ އަގުތަކަށް ބަދަލުތައް ގެނައުމަށް މަސައްކަތް ކުރައްވާނެ ކަމަށް ޓްރާންސްޕޯޓު މިނިސްޓަރު މުހައްމަދު އަމީން ވިދާޅުވެއްޖެ އެވެ.

ޓްރާންސްޕޯޓު މިނިސްޓްރީގައި ބޭއްވި ނޫސްވެރިންގެ ބައްދަލުވުމެއްގައި އަމީން ވިދާޅުވީ އައިލެންޑް އޭވިއޭޝަނަކީ 2018 ވަނަ އަހަރާއި ހަމަޔަށް ސާފު ފައިދާ ހޯދަމުން އައި ކުންފުންޏެއް ކަމަށާއި ނަމަވެސް 2018 އާއި 2023 އާއި ހަމަޔަށް ވިޔަފާރި އޮތީ ވަރަށް ބޮޑުތަން ދަށަށް ގޮސްފައި ކަމަށެވެ. އައިލެންޑް އޭވިއޭޝަނަކީ ވިޔަފާރި އުސޫލުން ހިންގަން ޖެހޭ ކުންފުންޏެއް ކަމަށްވާއިރު އެ ކުންފުނީގައި ހިދުމަތް މަދުވެފައި މުވައްޒަފުން ގިނަ ކަމަށާއި މިދިޔަ ހަފްތާގައި އައިލެންޑް އޭވިއޭޝަންގެ މެނޭމެންޓަށް ބަދަލުތަކެއް ގެނެސްފައިވާ ކަމަށް އަމީން ވިދާޅުވި އެވެ.

އެގޮތުން އައިލެންޑް އޭވިއޭޝަން ރިސްޓްރަކްޗަރކޮށް، އޮޕަރޭޝަންތަކަށް ބަދަލުތައް ގެނައުމުގެ މަސައްކަތް ކުރިއަށްދާ ކަމަށާއި އޭގެތެރޭގައި ވައިޑް ބޮޑީ އެއާކްރާފްޓް ގެނައުން ހިމެނޭ ކަމަށް އަމީން ވިދާޅުވި އެވެ. އެއާއެކު އިންޓަނޭޝަނަލް އޮޕަރޭޝަންސްތައް އިތުރުވުމުން އައިލެންޑް އޭވިއޭޝަނަށް ކުރާ ފައިދާގެ އިތުރުން ގައުމުގެ އިގްތިސާދަށް ވެސް ކުރިއެރުންތަކެއް ލިބޭނެ ކަމަށް އަމީން ވިދާޅުވި އެވެ.

Advertisement

އަމީން ވަނީ މިހާރު ކުރެވޭ މަސައްކަތްތަކުގެ ތެރެއިން އެތެރޭގެ އުދުހުންތަކުގެ އަގަށް ބަދަލުތައް ގެނެވޭނެ ކަމަށް ގަބޫލުކުރައްވާ ކަމަށްވެސް ވިދާޅުވެފަ އެވެ.

"މިހާރު ހުރި ފެއާއަކީ ބޮޑު އަދަދެއްކަން ގަބޫލު ކުރަން. އެހެންވީމަ ކުންފުންޏާއި މަޝްވަރާކޮށްގެން ގެނެވެން ހުރި ބަދަލުތަކަށް ވަރަށް އަވަހަށް ކުރިއަށް ގެންދާނަން،" އަމީން ވިދާޅުވި އެވެ.

މިދިޔަ ސަރުކާރުގައި ވެސް އެތެރޭގެ އުދުހުންތަކުގެ އަގަށް ބަދަލުތަކެއް ގެނެސްފައިވެ އެވެ.