ކުރިއަށް އޮތް ރިޔާސީ އިންތިޚާބަށް ޕީޕީއެމްގެ ރިޔާސީ ކެނޑިޑޭޓު ރައީސް ޢަބްދުﷲ ޔާމީން ޢަބްދުލްޤައްޔޫމުގެ ކެމްޕޭނުގެ ތެރެއިން މާލޭގެ ގޭބީސީތަކަށް ޒިޔާރަތްކުރުމުގެ މަސައްކަތް މިއަދު ޕީޕީއެމް/ޕީއެންސީ ކޯލިޝަނުން ފަށައިފިއެވެ.

މާލޭގެ ގެތަކަށް ޒިޔާރަތްކުރާ ޓީމުތަކާއެކު މިއަދު ޕީޕީއެމްގެ ލީޑާޝިޕުންވަނީ ބައްދަލުކޮށްފައެވެ. އެ ބައްދަލުވުމަށްފަހު ޕީޕީއެމް/ޕީއެންސީ ކޯލިޝަން ވަގުތީ ގޮތުން ހިންގެވުމާ ހަވާލުވެވަޑައިގެން ހުންނެވި ޕީއެންސީގެ ރައީސް ޢަބްދުއްރަޙީމް ޢަބްދުﷲ ވިދާޅުވެފައިވަނީ ޕީޕީއެމްގެ ރިޔާސީ ކެނޑިޑޭޓު ރައީސް ޔާމީނުގެ ކެމްޕެއިނުގެ މަސައްކަތް މިއަދު ފެށިގެންދާނެ ކަމަށެވެ. އަދި މި މަސައްކަތް ޕީޕީއެމުން ހުއްޓާލާނީ އިންތިޚާބު ކާމިޔާބުކުރުމަށްފަހުގައި ކަމަށެވެ. 

އަދި ކުރިއަށް އޮތް ރިޔާސީ އިންތިޚާބުގައި ރައީސް ޔާމީނަށް ވާދަކުރެއްވޭނެ ކަމަށާއި، އެމަނިކުފާނުގެ މައްޗަށް ކުރިމިނަލް ކޯޓުން އިއްވާފައިވާ ހުކުމުގެ މައްސަލާގައި މަތީ މަރުހަލާގެ ކޯޓުތަކުން ކާމިޔާބު ލިބިވަޑައިގަންނަވާނެ ކަމުގެ ޔަގީންކަން އެބައޮތް ކަމަށްވެސް އަބްދުއްރަހީމް ވިދާޅުވިއެވެ. 

Advertisement

އަދުރޭ އިތުރަށް ވިދާޅުވީ ޕީޕީއެމުގެ އަމާޒު ހިފާފައި އޮތީ އެއް ބުރުން ރިޔާސީ އިންތިޚާބު ކާމިޔާބުކުރުމަށް ކަމުގައި ވިދާޅުވުމާއެކު އަދުރޭ ފާހަގަކުރެއްވީ ޕީޕީއެމް ރައީސް ޔާމީނުގެ ޒައާމަތުގައި ކެމްޕެއިން ހިންގައި ޕީޕީއެމަށް އެއްބުރުން އިންތިޚާބު ކާމިޔާބުކުރުމަކީ ފަސޭހަކަމެއް ކަމުގައެވެ. 

މިހާރު "ދަ ޑިމޮކްރެޓްސް"އާއެކު ޕީޕީއެމް/ ޕީއެންސީން ބާއްވަމުންދާ މަޝްވަރާތަކުގެ ވާހަކައަށް އަލިއަޅުވައިލައްވައި އަދުރޭ ވިދާޅުވީ އެ ޕާޓީއާއެކު ޕީޕީއެމުން ރިޔާސީ އިންތިޚާބުގެ ވާހަކަތައް ނުދައްކާ ކަމަށެވެ. އެ ޕާޓީއާއެކު މަޝްވަރާކުރަނީ ޤައުމަށް ކުރިމަތިވެފައިހުރި ބޮޑެތި މައްސަލަތަކުގައި ގުޅިގެން މަސައްކަތްކުރެވޭނެ ގޮތްތަކަކާ ބެހޭ ގޮތުން ކަމަށެވެ. 

މިއަދުވެސް ތަކުރާރުކޮށް އަބްދުއްރަހީމް ޔަގީންކަން ދެއްވި ގޮތުގައި ޕީޕީއެމުގެ ކެނޑިޑޭޓަކީ ރައީސް ޔާމީނެވެ. އަދި އެމަނިކުފާނު ނޫން އެހެން ބޭފުޅަކު ކެނޑިޑޭޓުގެ ގޮތުގައި ނެރުމުގެ ވިސްނުމެއް އެ ޕާޓީގައި ނެތްކަމަށް އޭނާ ވިދާޅުވިއެވެ. 

ފާއިތުވި އަހަރުގެ ޑިސެންބަރު މަހުގައި ރައީސް ޔާމީނުގެ މައްޗަށް ކުރިމިނަލް ކޯޓުން އިއްވާފައިވާ 11 އަހަރުގެ ޖަލު ހުކުމް އެމަނިކުފާނުގެ ފަރާތްޕުޅުން ދިވެހިރާއްޖޭގެ ހައިކޯޓުގައި އިސްތިއުނާފުކޮށްފައިވާއިރު، މިހާރު އެ މައްސަލައިގެ ތެރެއިން ދެ ޤަޟިއްޔާއެއްގެ އިސްތިއުނާފީ ނުކުތާތައް އިއްވައި ނިމިފައިވެއެވެ. 

ހައިކޯޓުގައި އޮތް މައްސަލަ ނިމުމުގެ ކުރިން އެމަނިކުފާނަށް އިތުރު ހުކުމެއްކުރުމަށް ކުރިމިނަލް ކޯޓުގައި ހިނގަމުންދާ ފުއްގިރި މައްސަލަ ފުލުފުލުގައި ކޯޓުގައި ތާވަލުކޮށް، ކޯޓު އަހަރު ދެބައިވުމުގެ ރިސެސްއަށް ނުގޮސް އެ މައްސަލަ ކުރިއަށްގެންދަން މަސައްކަތްކުރަމުން އަންނަކަމަށް މައުލޫމާތު ލިބިފައިވެއެވެ.