މޫސުން ގޯސްވުމާ ގުޅިގެން މާލެ އަތޮޅުން ފެށިގެން ދ.އަތޮޅަށް އަނެއްކާ ވެސް ޔެލޯ އެލާޓް ނެރެފިއެވެ.

މިއަދު ހެނދުނުން ފެށިގެން 14:30 އާ ހަމައަށް ވެސް އޭގެތެރެއިން ބައެއް އަތޮޅުތަކަށް އޮތީ ޔެލޯ އެލާޓް ނެރެފައެވެ.

މޫސުމާބެހޭ ގައުމީ އިދާރާއިން ބުނީ މާލެ އަތޮޅުން ފެށިގެން ދ.އަތޮޅަށް އަނެއްކާ ވެސް ޔެލޯ އެލާޓް ނެރެފައިވަނީ މިއަދު 18:00 އާ ހަމައަށް ކަމަށެވެ.

Advertisement

އެގޮތުން އެ އަތޮޅުތަކަށް ގުގުރުމާއެކު ބޯކޮށް ވާރޭވެހި ވިލާގަނޑުގައި ގަޑިއަކު 45 މޭލަށް ވައިގަދަވެ ކަނޑުތައް ގަދަވާނެ ކަމަށް ލަފާކޮށްފައިވެއެވެ.

މިހާރު ކުރަމުންދާ ވިއްސާރައިގައި މާލެއަށް ބޯކޮށް ވާރޭވެހި، ފެންބޮޑުވުމުގެ ސަބަބުން ޕަންޕު ބަހައްޓައިގެން ފެން ހިންދުމުގެ މަސައްކަތް އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ހުއްޓުމެއްނެތި ދަނީ ކުރަމުންނެވެ. އަދި ބައެއް ގެތަކަށް ފެން ވަންނަމުންދާތީ ގެތަކުގައި ވެލިބަސްތާ ޖެހުމުގެ މަސައްކަތް ވެސް ކުރަމުންދާ ކަމަށް އެމްއެންޑީއެފްއިން ބުންޏެވެ.

މީގެއިތުރުން ވިއްސާރައިގެ ސަބަބުން ދ.ކުޑަހުވަދޫގައި ފެންބޮޑުވެ ބައެއް ގެތަކަށް ފެންވަންނަމުންދާތީ އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިން އެ ރަށު ފެން ވަންނަ ގެތަކުގައި ވެލިބަސްތާ ޖެހުމުގެ މަސައްކަތް ކުރަމުންދާ ކަމަށް ވެސް އެމްއެންޑީއެފްއިން ބުންޏެވެ.