އިއްޔެ ކުރިއަށްގެންދިޔަ ބައި-އިލެކްޝަންތަކުގެ ދާއިމީ ނަތީޖާ މާދަމާ އިއުލާން ކުރައްވާނޭ ކަމަށް އިލެކްޝަންސް ކޮމިޝަންގެ ނައިބު ރައީސް އިސްމާއިލް ހަބީބު ވިދާޅުވެއްޖެއެވެ.

އިއްޔެ ކުރިއަށްގެންދިޔައީ މާލެ ސިޓީ މޭޔަރާއި، މާލެ ސިޓީ ކައުންސިލްގެ މާފަންނު ދެކުނު ދާއިރާ އާއި މެދު ހެންވޭރު ދާއިރާ އާއި ހެންވޭރު ދެކުނު ދާއިރާގެ އިތުރުން މ.މުލަކު އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މެންބަރު ހޮވުމަށް ބޭއްވި ބައި-އިލެކްޝަނެވެ. މިބައި- އިލެކްޝަންތަކުގެ ވަގުތީ ނަތީޖާ ރޭ އިލެކްޝަންސް ކޮމިޝަނުންވަނީ އިޢުލާންކުރައްވާފައެވެ.

ކޮމިޝަންގެ ނައިބު ރައީސް އިސްމާއިލް ހަބީބު ވިދާޅުވީ ހުރިހާ މަރުކަޒެއްގައި ވެސް ވޯޓުލުމުގެ ކަންކަން ކުރިއަށްދިޔައީ ވަރަށް އަމާންކަމާއެކުގައި ކަމަށެވެ.

Advertisement

ހަބީބު ވިދާޅުވީ އާއްމުކޮށް ވެސް ބައި-އިލެކްޝަންތަކުގައި ވޯޓުލާ މީހުންގެ އަދަދު މަދު ކަމަށާއި އިއްޔެ ބައި-އިލެކްޝަންގައި ވޯޓު ލީ މީހުންގެ އަދަދު ގޯސް ކަމުގައި ބެލެވެން ނެތް ކަމަށެވެ.

އިލެކްޝަންސް ކޮމިޝަނުން ވިދާޅުވެފައިވާ ގޮތުގައި އިއްޔެގެ ބައި-އިލެކްޝަނުގައި 56،002 މީހުންނަށް ވޯޓުލުމުގެ ޙައްގު ލިބިފައިވާއިރު ވޯޓު ލާފައިވަނީ 32 އިންސައްތައެއްހާ މީހުންނެވެ.

ހަބީބު ވިދާޅުވީ މި ބައި- އިލެކްޝަންގައި ވޯޓު ފޮށިތައް ބަންދުކޮށް ވަގުތީ ނަތީޖާ އިއުލާން ކުރުމާ ހަމައަށް ލިބުނީ ހަތް ޝަކުވާ ކަމަށެވެ. އޭގެ ތެރެއިން ތަހުގީގު ކުރަން ޖެހޭ މައްސަލައެއްވާނަމަ އެ މައްސަލަތައް ތަހުގީގު ކުރައްވާނެކަން އޭނާ ފާހަގަކުރެއްވިއެވެ.

ކުރިއަށް މުހިންމު އިންތިޚާބުތަކެއް ހުރިކަން ފާހަގަކުރައްވައި ހަބީބު ވަނީ ޑިމޮކްރަސީގެ ރިވެތި އުސޫލުތައް ދެމެހެއްޓުމަށާއި ވޯޓުލުމުގެ ކަންކަން އަމާންކަމާއެކު ކުރިއަށްގެންދިއުމުގައި އެއްބާރުލުން ދެއްވުމަށް ރައްޔިތުންނާއި ސިޔާސީ ޕާޓީތަކުގެ ފަރާތުން އެދިވަޑައިގެންފައެވެ.