ރާއްޖެ ހިފަން ޖެހޭ ކަމަށް ވިދާޅުވެ މީގެ ކުރިން ވެސް ވާހަކަ ދައްކަވާފައިވާ އިންޑިއާގެ ބީޖޭޕީ އަށް ނިސްބަތްވާ ނުފޫޒު ގަދަ ބޭފުޅެއް ކަމަށްވާ ސުބްރަމާނިއަމް ސްވާމީ އަނެއްކާ ވެސް ވާހަކަ ދައްކަވައިފި އެވެ.

ރާއްޖޭގައި ތިބި އިންޑިއާ ސިފައިން އަންނަ މާޗް މަހުގެ 15 ގެ ކުރިން އަނބުރާ ގެންދަން ރައީސް ޑރ. މުހައްމަދު މުއިއްޒު އެދިވަޑައިގަތުމާ ގުޅިގެން ސުބްރަމާނިއަމް ސޯޝަލް މީޑިއާގައި ޕޯސްޓެއްގައި ވިދާޅުވީ އެކަމާ ގުޅިގެން އިންޑިއާ އިން އެކަމަށް އަމަލު ކުރާނެތޯ ސުވާލު އުފައްދަވައިފަ އެވެ.

އޭނަ ވިދާޅުވީ ރާއްޖޭގެ އެ ނިންމުމާ އެކީ ބޮޑުވަޒީރު ނަރެންދުރަ މޯދީގެ ސަރުކާރުން އިންޑިއާގެ މޫނުމަތީގައި ތަފާލެއް ޖަހާނީތޯ ސުވާލު އުފައްދަވައިފަ އެވެ.

Advertisement

"ކުރިން ހެދިހެން އިންޑިއާގެ ސިފައިންގެ ފައުޖެއް ފޮނުވައިގެން ރާއްޖެ ހިފައި، އިތުބާރު ގެއްލިފައިވާ މިހާރުގެ ރައީސް މުއިއްޒުގެ ވެރިކަން ވައްޓާލާނީތޯ؟" މިނިސްޓަރުކަމާއި ގާނޫނު ހަދާ މަޖިލީހުގެ މެމްބަރުކަން ވެސް ކުރައްވާފައިވާ ހަރުކަށި ހިންދޫ ފިކުރުގެ ސުބްރަމާނިއަމް ވިދާޅުވި އެވެ.

އިންޑިއާގެ ފައުޖެއް ކުރިން "ރާއްޖެ ހިފަން" ދިޔަ ކަމަށް އޭނަ އިޝާރާތްކުރެއްވީ ނޮވެމްބަރު 3، 1988 އާ ގުޅިގެން، ރާއްޖެ އަށް އެހީވާން، އޭރުގެ ބޮޑުވަޒީރު ރަޖީވް ގާންދީ އިންޑިއާގެ ފައުޖެއް ފޮނުއްވި ފޮނުއްވުމަށެވެ.

ރާއްޖެ ހިފަން ޖެހޭ ކަމަށް ވިދާޅުވެ، ސުބްރަމާނިއަމް ކުރިން ވާހަކަ ދެއްކެވީ 2018 ގަ އެވެ.

ރާއްޖޭގައި ތިބި އިންޑިއާ ސިފައިން ފޮނުވާލަން، އެކަމާ ގުޅޭ "ކޯ-ގްރޫޕް" ގެ މަޝްވަރާތައް ރަސްމީކޮށް ރާއްޖޭގައި ފެށީ އިއްޔެ އެވެ. އިންޑިއާ ސިފައިން ފޮނުވާލުމަކީ ރައީސްގެ ރިޔާސީ ވައުދެކެވެ.

އިންޑިއާ އާއި ރާއްޖެއާ ދެމެދު ވަނީ ވަރަށް ބޮޑު ނުތަނަވަސްކަމެއް އުފެދި އެވެ. އެއީ ސަރުކާރުގެ ޑެޕިއުޓީ މިނިސްޓަރުންތަކެއް މޯދީއަށާއި އިންޑިއާ އަށް ކުޑައިމީސްކޮށް ސޯޝަލް މީޑިއާގައި ދެއްކެވި ވާހަކަތަކަކާ ގުޅިގެންނެވެ. އެކަމާ ގުޅިގެން އިންޑިއާ އިން ރާއްޖޭގެ ޓޫރިޒަމް ބޮއިކޮޓްކޮށް، އެ ގައުމުގެ ލަކްޝަދީޕް ޕްރޮމޯޓްކުރަން މިހާރު ދަނީ ވަރުގަދަ ކެމްޕޭނެއް ކުރަމުންނެވެ.