ރާއްޖޭގެ ޖަލުތައް އެއްކޮށްލާ ސެންޓްރަލް މައި 1 ޖަލު ތަރައްޤީކުރުމަށް ސަރުކާރުން މަސައްކަތް ކުރައްވަމުންދާ ކަމަށް ދާޚިލީ ސަލާމަތާއި ފަންނިއްޔަތާ ބެހޭ ވަޒީރު ޢަލީ އިޙުސާނު ވިދާޅުވެއްޖެއެވެ.

ވަޒީރު އިޙުސާނު ވިދާޅުވީ، ގައިދީން ބެލެހެއްޓުުމުގެ ނިޒާމު ހަރުދަނާކުރުމަށް ކުރެވޭނެ ކަންކަމުގެ ދިރާސީ މަސައްކަތްތަކެއް ކުރައްވަމުން ގެންދަވާކަމަށެވެ. އެގޮތުން މިދާއިރާއިން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ އެންމެ މުހިންމު އެއް ވިސްނުންފުޅަކީ، މިހާރު އެކި ރަށްރަށުގައި ވަކިވަކިން ހިނގަމުން އަންނަ ޖަލުތައް އެއްކޮށްލާ، މައި އެއް ޖަލަކުން ހުރިހާ ޚިދުމަތްތައް ދެވޭނެ ގޮތަށް ނިޒާމު ބައްޓަންކުރެއްވުންކަމަށެވެ.

މިވަގުތު ހުޅުމާލެ، ދޫނިދޫ އަދި މި ސަރަޙައްދުން ހިންމަފުއްޓާއި މާފުށީގައިވެސް އަންނަނީ ޖަލު ހިންގަމުންނެވެ. މިތަންތަނުގައި ޖާގައިގެ ދަތިކަންވެސް ވަރަށް ބޮޑަށް ކުރިމަތިވެއެވެ.

Advertisement

ވަޒީރު ވިދާޅުވީ ޖަލުތައް ހިންގުމުގެ ނިޒާމު މިހާރު އޮތްގޮތުން އެކަމަށް ކުރަންޖެހޭ ހޭދަ ބޮޑުވުމާއި، އެކަށީގެންވާ ޚިދުމަތެއް ދިނުމަށްވެސް ހުރަހަކަށްވާކަމަށެވެ. މިވަގުތު ޖަލުތަކުގައި ގައިދީއެއްގެ ބޮލަކަށް މަހަކު 21000 އާއި 30000އާ ދެމެދުގެ އަދަދެއް ޚަރަދުވާކަމަށްވެސް ވަޒީރު ވަނީ ވިދާޅުވެފައެވެ. މި މައްސަލަތައް ޙައްލުކޮށް، ރިހެބިލިޓޭޝަން ޚިދުމަތްތަކާއެކު ޖަލުތައް ހިންގޭނެ އެންމެ އެކަށީގެންވާ ގޮތެއްގެ ގޮތުގައި ސަރުކާރުން ދެކެނީ، ސެންޓްރަލް މައި ޖަލެއް ޤާއިމުކޮށް ޚިދުމަތް ދިނުން ކަމަށް ޢަލީ އިޙުސާނުު ވިދާޅުވިއެވެ.

ވަޒީރު ވިދާޅުވީ އެންމެ ބޮޑު އަމާޒަކީ ކުށް މަދު މުޖުތަމަޢެއް ބިނާކުރުންކަމަށެވެ. އެމަގުން ގިނަ މުހިންމު މަސައްކަތެއް މި ދައުރުގައި ކުރައްވާނެކަމަށެވެ.