ފުވައްމުލަކު ސިޓީ އެއަރޕޯޓް ބޮޑުކޮށް، ޖެޓް ޖެއްސޭ ފެންވަރަށް ތަރައްޤީކުރުމަށް ހަމަޖެހިފައިވާކަމަށާއި، އެކަމަށްޓަކާ ބޭނުންވާ އިނީޝިއަލް ސަރވޭގެ މަސައްކަތްކުރާނެ ބަޔަކަށް ހޯދުމަށް ވަރަށް އަވަހަށް އިޢުލާންކުރެވޭނެކަމަށް ރީޖަނަލް އެއަރޕޯޓްސް ކޮމްޕެނީ ލިމިޓެޑްއިން ވިދާޅުވެއްޖެއެވެ.

ފުވައްމުލަކު އެއަރޕޯޓު ރަންވޭ ދިގުކޮށް، ޖެޓް ޖެއްސޭ ފެންވަރަށް ތަރައްޤީކުރެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ. ފުވައްމުލަކު އެއަރޕޯޓު ބޮޑުކޮށް، ޖެޓް ޖެއްސޭ ފެންވަރަށް ތަރައްޤީކުރުމާގުޅޭގޮތުން ރީޖަނަލް އެއަރޕޯޓްސް ކޮމްޕެނީ ލިމިޓެޑްއިން ވަނީ ފުވައްމުލައް ސިޓީ ކައުންސިލާއި ބައްދަލުކޮށް، އެކަމުގެ މަޢުލޫމާތު ހިއްސާކޮށް މަޝްވަރާތައް ކޮށްފައެވެ.

ރީޖަނަލް އެއަރޕޯޓްސްގެ މެނޭޖިންގ ޑިރެކްޓަރ އަޙްމަދު މުބީން ވިދާޅުވީ، ފުވައްމުލަކަކީ ގުދުރަތީގޮތުން ޚާއްސަ ސިފަތަކެއް ލިބިފައިވާ ސިޓީއަކަށްވެފައި، އެއަރޕޯޓުގެ ރަންވޭ މިހާރު އޮތްގޮތުން ފަޅު ހިއްކައިގެން ރަންވޭ އިތުރަށް ދިގުކުރެވެން ނެތްކަމަށެވެ. އަދި އެކަން ކުރެވެން އަންނަނީ ރަންވޭގެ އޮރިއެންޓޭޝަން ބަދަލުކޮށްގެންކަމަށްވާތީ، އެކަމަށް ހުރި އޮޕްޝަންތަކާގުޅޭ ކައުންސިލާއެކު މަޝްވަރާކުރެއްވިކަމަށް މުބީން ވިދާޅުވިއެވެ.

Advertisement

ފުވައްމުލަކު އެއަރޕޯޓުގައި މިހާރު ބޭނުންކުރަނީ 1200 މީޓަރު ދިގު ރަންވޭއެކެވެ. މި އެއަރޕޯޓް ތަރައްޤީކޮށް ހުޅުވާފައިވަނީ 2011 ވަނަ އަހަރުގެ ނޮވެމްބަރުމަހުގެ ތެރޭގައެވެ. އެއަރޕޯޓް ބޮޑުކުރުމުގެ މަސައްކަތުގެ ތެރެއިން ރަންވޭގެ ޖާގަ 1600 ނުވަތަ 1800 މީޓަށް ބޮޑުކޮށް ޖެޓް ޖެއްސޭވަރަށް ތަރައްޤީކުރެވިގެންދާނެކަމަށް ރީޖަނަލް އެއަރޕޯޓްސްއިން ބުނެއެވެ.

މީގެ އިތުރުން ޖެޓް ޕާކިންއަށް ޚާއްސަކޮށްގެން އޭޕްރެން ޖާގައިތުރު ކުރުމާއި، ޖެޓް ފިއުލް ލިބޭނެ އިންތިޒާމު ހަމަޖެއްސުންވެސް ހިމެނެއެވެ.