އެމްއެންޑީއެފްއިން ކުޑަކުދިންގެ ހިޔާގައި ތިބި ކުދިންނަށް ކްލާސްތަކެއް ހިންގައިފިއެވެ.

އެމްއެންޑީއެފްއިން ހުޅުމާލެ ކުޑަކުދިންގެ ހިޔާގައި ތިބި ކުދިންނަށް އިއްޔެ ހެނދުނު 08:30 އިން ހަވީރު 15:30 އަށް ބޭއްވި ކްލާސްތައް ހިންގާފައިވަނީ، ކ. ހުރާގައެވެ.

ކޭމްޕެއްގެ ގޮތުގައި ހިންގި ކްލާސްތައް ކުރިއަށް ގެންދިޔައީ އެމްއެންޑީއެފް މާލެ އޭރިއާ ކޮމާންޑުންނެވެ. އަދި، އެ ކްލާހުގައި ކުޑަކުދިން ހިޔާގެ ކުދިންނަށް ސަލާމަތީ މުހިއްމު ހުނަރުތައް ދަސްކޮށްދީފައިވާނެކަމަށް އެމްއެންޑީއެފްއިން މައުލޫމާތު ދީފައިވެއެވެ.

Advertisement

އެގޮތުން އެ ކޭމްޕުގައި ބައިވެރިވި ކުދިންނަށް، އަލިފާން ނިއްވުމުގެ ރައްކާތެރި އުކުޅުތައް ދަސްކޮށްދީ، އަވަސް ފަރުވާ ދިނުމުގެ އެވެއަރނަސް ކްލާސްތަކެއް ހިންގާފައިވާކަން އެމްއެންޑީއެފްއިން ފާހަގަކޮށްފައިވެއެވެ. އަދި މީގެ އިތުރުން، ފަތަން ދަސްކޮށްދޭ ކްލާސްތަކެއްވެސް އެ ކޭމްޕުގައި ހިންގާފައިވެއެވެ.

އެގޮތުން، އެ ކޭމްޕުގައި ޖުމްލަ 52 ކުދިން ބައިވެރިވެފައިވެއެވެ. އެއީ، 32 ފިރިހެން ކުދިންނާއި 20 އަންހެން ކުދިންނެވެ. އަދި، ދަރިވަރުންނަށް އުނގަންނައިދިނުމުގައި ހަރަކާތްތެރިވެފައިވަނީ، ކިޔަވައިދިން ދާއިރާތަކުން ގާބިލް ސިފައިންކަމަށް އެމްއެންޑީއެފްއިން މައުލޫމާތުދީފައިވެއެވެ.

އެ ކޭމްޕުގައި ބައިވެރިވި ކުދިންގެ ސަލާމަތީ ކަންކަން ކަށަވަރުކުރުމަށްޓަކައި މެދުނުކެނޑި ފިޔަވަތީގެ ސްޓާފުންނާއި ސިފައިން ހަރަކާތްތެރިވެފައިވާކަން އެމްއެންޑީއެފްއިން ފާހަގަކޮށްފައިވެއެވެ.