މިދިޔަ މަހުގެ 18 ވަނަ ދުވަހުގެ ފަތިހުގެ ވަގުތެއްގައި ގ. ރަނައުރާގެއާގެ، ހައްވާ ޔުމްނު ރަޝީދު (21 އ) ވެއްޓި ބޮޑެތި އަނިޔާތަކެއް ލިބުނު މައްސަލައިގައި ހައްޔަރުކޮށްފައިވާ  ރައުދު އަހުމަދު ޒިލާލު ބަންދުން ދޫކޮށްލައިފިއެވެ.

ރައުދު ދޫކޮށްލާފައިވަނީ ދެވަނަ ފަހަރަށް އޭނާ ހައްޔަރުކޮށް ބަންދަށް ކްރިމިނަލް ކޯޓުން 5 ދުވަހުގެ މުއްދަތެއް ޖަހާފައިވަނިކޮށެވެ.

ދިވެހި ފުލުހުންގެ ޚިދުމަތުން ވިދާޅުވީ ރައުދުގެ މައްޗަށް ދައުވާ އުފުލުމަށްޓަކައި ޕްރޮސެކިއުޓަރ ޖެނެރަލްގެ އޮފީހަށް ހުށަހަޅާފައިވާ ކަމަށެވެ. ނަމަވެސް މައްސަލައިގެ ލިޔެކިޔުންތައް ދިރާސާކުރުމަށްފަހު، އޭނާ ބަންދުން ދޫކޮށްލުމަށް ޕްރޮސެކިއުޓަރ ޖެނެރަލްގެ އޮފީހުން އިރުޝާދުދީފައިވާ ކަމަށްވެސް ވިދާޅުވިއެވެ.

Advertisement

ޕްރޮސެކިއުޓަރ ޖެނެރަލްގެ އޮފީހުން ދީފައިވާ އިރުޝާދާއެއްގޮތަށް ރައުދު ބަންދުން ދޫކޮށްލާފައިވަނީ ރޭގެ ވަގުތެއްގައި ކަމަށް ފުލުހުން ވިދާޅުވެއެވެ.

ޔުމްނު ވެއްޓިފައި އޮތްވާ ފެނުނު މައްސަލައާ ގުޅިގެން ރައުދު އަހުމަދު ޒިލާލު ހައްޔަރުކުރީ އޭނާ ވެއްޓުނުއިރު އޭނާއާއެކު ރައުދު ހުރިކަން ވީޑިއޯ ފުޓޭޖްތަކުން ފެންނާތީއެވެ. ޔުމްނު ވެއްޓުނީ ހ. ފެންޓޯނިއާގެއިންނެވެ. އެ ގޭގައި ރައުދުއާއި ޔުމްނު އެކުގައި އުޅޭ މަންޒަރު ސީސީޓީވީ ފުޓޭޖުތަކުން ފެނެއެވެ.

މިހާދިސާގައި ވެއްޓުނު ޔުމްނުއަށް އައިޖީއެމްއެޗްގައި ފަރުވާދިނުމަށްފަހު އިތުރުފަރުވާއަށް މިހާރުވަނީ މެލޭޝިޔާއަށް ގެންގޮސްފައެވެ.