ފުވައްމުލަކު ޗަސްބިމެއްގައި ރޯވެއްޖެ
ފުވައްމުލަކު ޗަސް ބިމެއްގައި އަލިފާން ރޯވެ ބޮޑެތި ގެއްލުންތަކެއްވެއްޖެ އެވެ.
މި ހާދިސާ ހިނގާފައި އެ ސިޓީގެ ފުނާޑު އަވަށުގެ ބަންޑާރަ ކިޅި ސަރަހައްދުގަ އެވެ.
އެމްއެންޑީއެފުން ބުނީ، އަލިފާނުގެ ހާދިސާ ހިނގިކަމުގެ މައުލޫމާތު ލިބިފައިވަނީ ރޭ 10:35 ހާއިރު ކަމަށާއި އެ އަލިފާންގަނޑު ނިއްވާލުމަށް ސަދަން އޭރިއާ ކޮމާންޑާއި ފުވައްމުލަކު ފަޔަ ސްޓޭޝަނުން ހަރަކާތަތެރިވެފައިވާ ކަމަށެވެ.
މީގެ ދެ މަސް ކުރިން ފުވައްމުލަކުގެ ހޯދަނޑު ޗަސްބިން ސަރަހައްދުގައި ވެސް ރޯވެ، ގާތްގަނޑަކަށް އެ ތަނަށް ބޮޑެތި ގެއްލުންތަކެއް ލިބުނެވެ. އަދި ހަމަ އެ މަހު ފުވައްމުލަކު ދަނޑިމަގު ޗަސްބިން ސަރަހައްދުގައި ވެސް ރޯވެފައިވެ އެވެ.
ފުވައްމުލަކުގެ އިތުރުން އައްޑޫގެ ޗަސް ބިން ސަރަހައްދުތަކުގައި ވެސް މިފަދަ ހާދިސާތައް ވަރަށް ގިނައިން ހިނގާކަން ފާހަގަކޮށްލެވެ އެވެ.