މަރުކަޒީ ބޭންކް، އެމްއެމްއޭ މެދުވެރިކޮށް ސަރުކާރުން އޯވަޑްރޯ ކުރާ ފައިސާގެ އަދަދު ދެ ބިލިއަން ރުފިޔާ އަށް ލިމިޓްކޮށްފި އެވެ.

ސަރުކާރުން ފައިސާ ޗާފު ކުރާ އަދަދު ލިމިޓްކުރި އިރު މި އަހަރުގެ މިހާތަނަށް ވަނީ 4.2 ބިލިއަން ރުފިޔާ ޗާޕުކޮށް، އެ ފައިސާ ދިގު މުއްދަތުގެ ބޮންޑަކަށް ބަދަލުކޮށްފަ އެވެ.

ހަރަދުތައް ހަމަޖެއްސުމަށް އެމްއެމްއޭ އިން ފައިސާ ޗާޕު ކުރާ އިރު، މިއީ މިހާތަނަށް ސަރުކާރަކުން ފާސްކުރި އެންމެ ބޮޑު ބަޖެޓެއް ވެސް އޮތް އަހަރެވެ. އެއީ 42 ބިލިއަން ރުފިޔާގެ ބަޖެޓެކެވެ.

Advertisement

ފިނޭންސް މިނިސްޓްރީގެ ތަފާސްހިސާބުތައް ދައްކާ ގޮތުން އެމްއެމްއޭ އަށް ދިގު މުއްދަތުގައި ދައްކާ ބޮންޑުގެ ގޮތުގައި 12.5 ބިލިއަން ރުފިޔާ އެބަހުއްޓެވެ.

ސަރުކާރުން އަންނަނީ މިހާރު ވެސް އެމްއެމްއޭ މެދުވެރިކޮށް ފައިސާ އޯވަޑްރޯ ކުރަމުންނެވެ. މިދިޔަ ޖޫން މަހު 480 މިލިއަން ރުފިޔާ ޗާޕު ކުރި އެވެ. އޭގެ ކުރީ މަހު ވަނީ 1.6 ބިލިއަން ރުފިޔާ ޗާޕުކޮށްފަ އެވެ.

ފައިސާ އިތުރަށް ޗާޕުކޮށްގެން ދައުލަތުގެ ހަރަދުތައް ހަމަޖައްސާ ނަމަ އިގްތިސާދުގައި ދައުރުވާ ފައިސާ އިތުރުވެ، ބޭރު ފައިސާ އަށް އޮންނަ ޑިމާންޑު ދަށްވެ، ރާއްޖޭގެ އެކްސްޗޭންޖް ރޭޓަށް ނޭދެވޭ އަސަރު ކުރާނެ ކަމަށް މި އަހަރުގެ ބަޖެޓާ ގުޅިގެން އެމްއެމްއޭ އިން ދިން ލަފާގައި ވެސް ފާހަގަކޮށްފައި ވެ އެވެ.