މިދިޔަ މަހުގެ ތެރޭގައި 8 ގައިދީއަކަށް ރައީސުލްޖުމްހޫރިއްޔާއަށް ލިބިދޭ ބާރުގެ ދަށުން މާފުދީ ބަންދުން ދޫކޮށްލާފައިވާ ކަމަށް ކަރެކްޝަންސް އިން ބުނެފި އެވެ.

އެ އިދާރާއިން މިއަދު އާންމުކުރި ޖޫން މަހުގެ ތަފާސްހިސާބުތައް ދައްކާ ގޮތުން އެ މަހު ޖުމްލަ 47 މީހަކު ވަނީ ޖަލުން މިނިވަންކޮށްފަ އެވެ. އޭގެ ތެރޭގައި ބަންދުގެ މުއްދަތު ހަމަވެގެން 18 މީހުން ޖަލުން މިނިވަންކޮށްފައިވާއިރު، 8 މީހަކު މިނިވަންކޮށްފައިވަނީ ކުށް މާފުކޮށްފަ އެވެ.

ތަފާސްހިސާބުތަކުން ދައްކާ ގޮތުން މިދިޔަ މަހު ޖަލުން މިނިވަންކުރި މީހުން ޖަލަށް ލީ މީހުންނަށްވުރެ ގިނަ އެވެ.

Advertisement

މިދިޔަ މަހުގެ ތެރޭގައި 44 މީހުން ޖަލަށް ލާފައިވާއިރު، ތަފާސްހިސާބުތައް ދައްކާގޮތުން އޭގެ ތެރޭގައި އެންމެ ގިނައީ މަސްތުވާތަކެތީގެ މައްސަލަތަކުގައި ހައްޔަރުކުރި މީހުންނެވެ. އެއީ ޖަލަށްލީ މީހުންގެ 49 އިންސައްތަ އެވެ.

ދެވަނައަށް އެންމެ ގިނައީ ވައްކަމާއި ފޭރުމުގެ މައްސަލަތަކެވެ. މާރާމާރީގެ މައްސަލަތަކުގައި ބަންދުކުރި މީހުން މިދިޔަ މަހު ނިސްބަތުން މަދުކަމަށް ތަފާސްހިސާބުތަކުން ދައްކަ އެވެ.

ޖޫން މަހުގެ ތެރޭގައި 8 މީހަކަށް މާފުދީ ބަންދުން ދޫކޮށްލާފައިވާއިރު، މަސްތުވާތަކެތި ޓްރެފިކްކޮށްގެން މިދިޔަ ނޮވެމްބަރު މަހު އުމުރަށް ޖަލަށްލީ މީހެއްގެ ބަންދުގެ މުއްދަތު ރައީސް ކުރުކޮށްދީ މިނިވަންކުރި މައްސަލައެއްވެސް ފެންމަތިވެފައިވެ އެވެ.

މަސްތުވާތެކެތި ޓްރެފިކް ކުރާ މައްސަލަތަކުގައި ރައީސަށް މާފު ދެވޭނެ އުސޫލެއް ނޯވެ އެވެ. އެހެން ނަމަވެސް އަދަބުގެ މުއްދަތު ކުރު ކުރުމަކީ ރައީސަށް ލިބިފައިވާ ބާރެކެވެ. ރައީސް އިބްރާހީމް މުހައްމަދު ސޯލިހު ވަނީ އެ ބާރު ބޭނުންކުރައްވައިގެން ޅ.ހިންނަވަރު މުހައްމަދު ރިޝްވާން ހުކުމުގެ މުއްދަތު ކުރުކޮށް، ބަންދުގައި ތިން މަސް ވީތަނާ އޭނާ މިނިވަންކޮށްފަ އެވެ.